अमेरिकाय् निगू करोड स्वया अप्व कोरोना संक्रमण जुइगु आशंका
लहनान्युज | दिल्लाथ्व पंचमी ११४०,असार १२ शुक्रवाः
अमेरिकाय् निगू करोड स्वया अप्व मनू तयेत कोरोना संक्रमण जुइगु आशंका याना हःगु दु । अमेरिकाया सेन्टर फर डिजिज कन्ट्रोल (सीडीसी) नं थथे आशंका याःगु खः ।
सीडीसीया डाइरेक्टर डा. रोबर्ट रेडभिफल्डं म्हिगः बिहीवाः सन्चारकःमिपि नाप खँ ल्हाःना दिसे जिमिगु आँकलन कोरोना संक्रमणया छगू रिपोर्ट वये ल्यःदनि, उगु रिपोर्ट वःलकि सिइ दइ । अले जक धाये फइ मेगु झीम्हेसित संक्रमण फैलै जुइ फइ धका धयादिगु खः ।
सीडीसीया कथं थुगु महामारीं यक्को ल्याय् म्ह त जुइ धका धाःगु दु । तर ल्याय् म्हपिन्त जुगु इलय् ल्याय् म्हपिके रोग प्रतिरोधक क्षमता अप्वइगुलि सीइगु कम जुइ धका धाःगु दु ।
सीडीसीया संक्रामक रोग विशेषज्ञ डा. जोय बटलरया कथं ल्याय् म्ह तयेत यक्को संक्रमित जुइगुया कारण उमिके बढा तयके स्वया कम सुरक्षाया उपाय अपने याःसा गाः ।
अमेरिकां ल्याय् म्हपिन्त जागरुक दयेकेत टिकटक थेजाःगु सामाजिक सन्जालं छ्यलिगु योजना दयेकुगु दु ।
विश्व स्वास्थ्य संगठन (डब्ल्यूएचओ) या आपतकालीन टिमया प्रमुख डा. माइक रियानया कथं अमेरिका आः तक न कोरोना संक्रमण उच्च विन्दुइ थ्यःगु मदुनि । वइगु दिनय् संक्रमितपि व सीइपिनिगु ल्याः अझ अप्वइगु सम्भावना दु धका धाःगु दु ।
अमेरिकाया जोन्स हप्किन्स विश्वविद्यालयया कथं थौं अमेरिकाय् कोरोना संक्रमितपिनिगु ल्याः २४ लाख ५२ द्धः अप्वःगु दु । अथेतु १ लाख २५द्धः स्वया अप्व मनूत सीइ धुकुगु दु ।
