अमेरिकाय् हाकनं संक्रमण अप्वल
गुंलागा पंचमी ११४१, भाद्र ११ शुक्रवाः
अमेरिकाय् कोरोना भाइरसया संक्रमण हाकनं अप्वःयावंगु दु । वंगु दँ थुगु हे ईया सिवें संक्रमित ल्याः निदुगं दूगु अमेरिकी स्वास्थ्य अधिकारीतयेसं धाःगु दु ।
आः अमेरिकायंक कोरोनाया १गू लख विरामी अस्पतालय् वासः याकाच्वंगु दूगु व थुगु ल्याः थगुने खोप उपलब्ध मजूगु ईया सिवें निदुगं जूगु नं उमिसं धाःगु दु । डेल्टा भेरियन्टया संक्रमणं बुलुहुँ ख्याच्वःया गं थायेकुगु उमिगु धापू दु ।
अमेरिकी खाद्य तथा औषधी प्रशासनया प्रमुख डा पल ओफिटं खोप उपलब्ध जुइकं जुइकं नं थौंकन्हय् जक अस्पताल भर्ना जूपिनि ल्याःखं पीडादायी लु क्यंगु धयादील । अयेसां अस्पताल भर्ना जूपिं अप्वः धैथें खोप मकाःपिं दु ।
थगुने अगष्टय् झीलिसे खोप मदूगु अवस्था खः तर आः बाब्व सिवें अप्वः जनसंख्यायात खोप बियधुंका नं अवस्था वंगु अगष्टया सिवें तसकं खराब दु ” ओफिटया धापू दु । कोरोना नियन्त्रणय् डेल्टा भेरियन्ट तःधंगु हाथ्याः जूगु नं वयेकलं धयादील ।
अमेरिकी स्वास्थ्य तथा मानव सेवा विभागया लिपांगु तथ्यांक कथं आः अमेरिकाय् १गू लख ३सः व १७म्ह कोरोनाया विरामी अस्पतालय् दु । थुगु ल्याः ९ वा न्ह्यःया सिवें ६ दुगं अप्वः खः ।
खोप काःपिं संक्रमित जुया अस्पताल भर्ना जुइगु प्रतिशत ४ गू फुति ९ गू प्रतिशत दूबलय् खोप मकाःपिं धाःसा २९गू फुति २गू प्रतिशत अस्पताल भर्ना जुइमाःगु नं उगु विभागं न्ह्यथंगु दु ।
Categorized in अन्तर्राष्ट्रिय
