२०८० चैत्र १६, शुक्रबार

अर्जेन्टिनां वर्ल्ड कपय् म्हिते मखनीगु खःला ?

- प्रजित शाक्य
 
लियोनेल मेसीया जँ स्याःगु लनेधुंकल । अथेखःसां प्रशिक्षक एड्गार्डो बाउजा धाःसा रुसय् जुइगु विश्वकप फुटबल धेंधें बल्लाखय् अर्जेन्टिना ल्यज्याय् मलाइगु खःला धकाः ग्यानाच्वंगु दु ।
 
सन् २०१८य् जुइगु विश्वकप ल्यज्याय् प्रतिस्पर्धा यानाच्वंगु अर्जेन्टिनायात नकतिनि फिफां याःगु छगु निर्णयनं झन् दिक्दार याःगु दु । 
 
अयोग्य कासामियात म्हितकल धकाः फिफां बोलिभियायात मेगू निगू ल्यज्या कासा म्हितके मबीगु निर्णय यासें न्हापाया निगू कासाया लिच्वः हिलाः चिली व पेरुयात ल्याः ब्यूगू दु । उकें अर्जेन्टिनायात धाःसा बेफाइदा जूगु खः ।
 
सेप्टेम्बरय् बोलिभियां चिलीलिसे ०/० ज्वलिंज्वः म्हितूगु खःसा पेरुयात २/० गोल अन्तरं बुकूगु खः । थ्व निगू कासाया लिच्वः हिलाः फिफां ३/० गोलं बोलिभिया बूगु निर्णय याःगु खः । फिफाया थुगु उहलं चिलीयात निगू ल्या: अप्वः प्राप्त जुल । 
 
बोलिभियाया डिफेन्डर नेल्सन काब्रिरायात म्हितकल धकाः चिली व पेरुं उजुरी याःगु खः । काब्रिरा बोलिभियाय् हे बूगु खःसां पाराग्वेया नितिं नं म्हितूगुलिं व अयोग्य घोषित जूगु खः ।
 
निगू भाग्यशाली ल्याः कयाः चिली दक्षिण अमेरिकी पुचलय् अर्जेन्टिना स्वयां च्वय् न्यागूगु ल्याखय् लाःवःगु दु । दक्षिण अमेरिकी पुचलय् प्यंगू पुचः जक स्वतः विश्वकपय् ल्यइगु प्रावधान दु ।
 
 
 
न्यागूगु ल्याखय् लाइगु पुचः प्लेअफ म्हितेत बाध्य जुइ । थुगु इलय् अर्जेन्टिना न्यागूगु ल्याःखय् न मदु ।
 
‘जितः चिन्ता जुयाच्वंगु दु, छाय्धाःसां विश्वकपय् थ्यनीगु पक्कापक्की मजूनि, मेगु यक्व कासा त्याके हे माःगु अवस्था दु’ – अर्जेन्टिनाया प्रशिक्षक बाउजाया धापू दु । मेखे बोलिभियां थःत याःगु कारवाही विरुद्ध अपिल यायेगु धयाच्वंगु दु ।
 
थज्याःगु प्रतिकुल इलय् ब्राजिलय् जूगु विश्वकपया फाइनलय् थ्यंगु अर्जेन्टिनाया मुक्कं आसा मेसीयाके हे थानाच्वंगु दु । मेसी स्वस्थ जूगु जक अर्जेन्टिनाया निम्तिं न्ह्यइपुसेच्वंगु व लसतां जाःगु बुखँ जुयाच्वंगु दु ।
 
दक्षिण अमेरिकी ल्यज्याय् झिगू चरण क्वचायेधुंकाः ब्राजिल दक्कलय् न्ह्य?ने दु । वयां लिपा उरुग्वे, इक्वेडर, कोलम्बिया व चिली दु ।