२०८० चैत्र १६, शुक्रबार

अवसरया आवश्यकता

जुजुमान महर्जन
 
न्हापा कासायात उलि बांलाःगु कथं काइ मखुगु खः । तर आः ई हिले धुंकल । कासापाखें नं छु  छुं यायेफु अर्थात कासापाखें थःगु जीवन हनेगु जक मखु, छेँजःपिन्त तक नं लहीफु धइगु अवस्था ब्वलने धुंकूगु दु ।
 
ब्वाज्या कासाय् न्हापांखुसी अन्तराष्ट्रिय कासाय् स्वर्ण पदकत्याका नेपाःया न्हाय् धस्वाकादीम्ह बैकुण्ठ मानन्धर उगु इलय् कासापाखें थःगु जीवन हनेफइ धकाः थःगु जीवन पाःगु मखु, बरु देय् व थःगु सोखया नितिं जक थुगु लजगाःयात नाला काःगु खः । थ्व पाखें आत्म सन्तुष्टि यक्व हे दत जुइ, तर पारिवारीक सन्तुष्टि धाःसा बीमफूगु यक्व हे खँत इलय् ब्यलय् पिहाँवइगु खः । कासायात ब्यवसायीकरण यानाः न्ह्याः मवंतलय् कासाया स्तर थाहाँ वनीमखु धइगु सम्बन्धित ख्यःया विज्ञपिनिगु धापू खः ।
 
 
अथे खःसां नं नेपालय् कासायात गब लें नं व्यवसायीकरण याय्गु कुतः मयात वा याये मफुत थ्व थःगु हे थासय् दु । कासाय् न्ह्याबलें राजनीतिकरण व नातावाद, कृपावादं थाय् काःगुलिं थुकिया विकास जुइ मफूगु खः । तर झी कासामि तयेसं मदिक्क कुतः यानाः कासाया स्तरयात थ कायेगु गुगु ज्या जुयाच्वंगु दु, उकियात कयाः न्ह्याक्व च्व छासां म्हो हे जुइ । आःतक नं बांलाःगु ह्वःताः बीफूगु मदुनि, नेपाःया कासामि तयेत । यदि अजाःगु हे ह्वःताः वल धाःसा नेपाःया कासामिपिन्सं थःगु प्रतिभा अन्तर्राष्ट्रिय स्तर अझ नं ब्वयाच्वंगु हे दु ।
 
 
थुकिया छगू दसू कथं काय्फु, नेपाःया क्रिकेट कासामि सन्दीप लामिछाने । नेपालय् लोकंह्वाःगु कासा धइगु क्रिकेट व फुटबल हे खः । क्रिकेट कासा थ कायेगु ज्या नेपाल क्रिकेट संघ, क्यानं स्वयां अप्वः कासामि पिनिगु तःधंगु योगदान दु ।
 
 
राजनीतिकरणं यानाः क्यान ला अन्तर्राष्ट्रिय ख्यलय् बदनाम तकं जूगु खः, अजाःगु अवस्थाय् नं कासामि तयेसं थःगु प्रतिभा न्ह्यब्वयाः विश्व क्रिकेट ल्य ज्या कासाय् तकं थ्यं केत ताःलाःगु खः । वया नाप नापं नेपाःया क्रिकेट कासामि लामिछाने अन्तर्राष्ट्रिय कासाय् अनुबन्धित जुयाः नां लिसें दां नं कमे यायेत ताःला ना च्वंगु दु । थ्व झीगु नितिं छगू तःधंगु शिक्षा खः ।
 
 
अथे हे नकतिनि जक नेपाःया राष्ट्रिय फुटबल टिमया मू दुजः रोहित चन्द इण्डोनेशियाया लिग वानय् उत्कृष्ट कासामि घोषित जुयाः थःगु अलय् देय्या नां तयेत ताःलाःगु दु । पर्सिजा जाकर्तायात लिग च्याम्पियन दयेका दीम्ह रोहितचन्द “मोष्ट भ्यालुएबल प्लेयर्स” व “उत्कृष्ट कासामि”या अवार्ड त्याकेत ताःलात । वय्कःया हे उत्कृष्ट ब्वज्याया हुनिं जाकार्तां लिग वनया उपाधि त्याकेत ताःलाःगु खः ।
 
 
नापं वय्कः दक्षिण एशियाली देशं पिने टिम च्याम्पियन व विधागत अवार्ड त्याकूम्ह न्हापांम्ह फुटबल कासामि नं जूगु दु । झीसं स्यू, रोहित नेपाःया फुटबल क्षेत्रय् तसकं बय्बय् जुया च्वंम्ह खः । अथे हे मेम्ह फुटबल कासामि बिमल घर्ती मगर नं बेल्जियमय् थःगु क्यारियर दय्केगु नितिं वनाच्वंगु दुसा फुटबल प्रशिक्षक बालगोपाल महर्जन, स्वीमर गौरिका नं थःगु प्रतिभा ब्वय्गु ज्या याय् धुं कूपिं लोकंह्वाःपिं कासामित खः ।
 
 
थथे यक्व हे कासामित झी के दु, तर उमित बांलाःगु ह्वःताः व हः पाः मदुगु हुनिं थःगु जीवनयात न्ह्याकेत थाकुया च्वंगु दु । कासामि पिनिगु क्षमतायात थुइकाः उमित बांलाःगु अवसरया नितिं लकस दय्का बीफत धाःसा नेपाःया कासाख्यः अझ बांलाना वनी । न्हूपिं कासामित ब्वलना वइ । थजाःगु नितिं सम्बन्धित पक्षं ध्यान बीमाःगु दु ।