विश्वकप क्रिकेट कासाय् विश्वविजेता अष्ट्रेलियां श्रीलंकायात ८७गू रनं बुकल ।

 

इङ्गल्याण्ड व वेल्सय् न्ह्यानाच्वंगु विश्वकप क्रिकेटय् अष्ट्रेलियां श्रीलंकायात अःपुक हे बुकूगु खः । ३३५गू रनया लक्ष पूवंकेगु झ्वलय् ब्याटिङ याःगु श्रीलंकां ४५.५गू ओभरय् फुक्क विकेटया क्षतिइ मुक्कं २४७गू रन जक दयेकेफत ।

 

श्रीलंकाया नितिं कप्तान दिमुख करुणारत्नें ९७गू रन दयेकल । वय्कलं कुशल परेरालिसे जानाः न्हापांगु विकेटया नितिं ११५गू रनया साझेदारी याःगु खः । कुशलं मुक्कं ३६गू बलय् ५गू चौका व १गू छक्का थ्वानाः ५२गू रन दय्कूगु खः ।

 

१५.३गू ओभरय् हे ११५गू रन दयेकूगु श्रीलंकां सुरुवाती उत्कृष्ट ब्याटिङ याःगु खः । तर मेमेपिं कासामितसें बांलाक्क कासा न्ह्यब्वये मफुत । कुशल मेण्डिसं ३६गू रन दयेकल ।

 

बलिङपाखे मिचेल स्टार्कं प्यंगू विकेट काल । अथे हे केन रिचार्डसनं स्वंगू व पट कुम्मिन्सं निगू विकेट काःगु खः ।

 

थ्व स्वयां न्ह्यः टस बुनाः न्हापां ब्याटिङ याःगु अष्ट्रेलियां क्वःछिनातःगु ५०गू ओभरय् ७गू विकेटया क्षतिइ ३३४गू रन दयेकूगु खः । अष्ट्रेलियाया नितिं कप्तान आरोन फिञ्चं उत्कृष्ट ब्याटिङ यासें शतकलिसें १५३गू रन दयेकूगु खः । वय्कलं १३२गू बलय् १५गू चौका व ५गू छक्का थ्वाःगु खः । अथे हे स्टिभेन स्मिथं ७३गू रन दयेकूगु इलय् ग्लेन म्याक्वेल ४६गू रनय् अविजित जुल ।

 

बलिङपाखे श्रीलंकाया इसुरु उदना व धनञ्जय डे सिल्भां समान २–२गू विकेट काःगु खः ।