अस्ट्रेलियां वयाः दिपक थः हे च्वन क्वारेन्टाइनय्
विकाश | चिल्लागा दशमी ११४०
अस्ट्रेलियां नेपाः लिहांवःम्ह पप गायक दिपक बज्राचार्य सेल्फ क्वारेन्टाइनय् च्वंवंगु दु । कन्सर्ट बीत अस्ट्रेलिया वंम्ह दिपक लिसें वयकःया रिदम ब्यान्डया न्याम्ह दुजःपिं आः सेल्फ क्वारेन्टाइनय् च्वंवंगु खः ।
बुधबाः न्हिनय् १२ः३०ताः इलय् नेपाल थ्यंम्ह दिपक व रिदम ब्यान्डया दुजःपिं त्रिभुवन अन्तर्राष्ट्रिय विमानस्थलं तप्यंक हे क्वारेन्टाइनय् च्वं वंगु खः । क्वारेन्टाइनय् दुहां वनाकथं दिपकं फेसबुकमार्फत लाइभ यासें थःपिं सेल्फ क्वारेन्टाइनय् च्वनागु जानकारी ब्यूगु खः ।
उसाँयस छुं समस्या नं मदुगु व थःपिं स्वस्थ दुगु खँय् ढुक्क हे जूसां सतर्कताया लागिं थःपिं क्वारेन्टाइनय् च्वनागु गायक बज्राचार्यं धाल ।
आःया अवस्थायात स्वयाः थःपिं हे सचेत जुयाः फुगु सावधानी लीमाःगु धासें दिपकं दक्वं नेपाःमियात सतर्क व सजग जुयाच्वनेत इनाप यात ।
दिपकलिसें वयकःया रिदम व्यान्डया न्याम्ह दुजःपिं क्वारेन्टाइनय् च्वनाच्वंगु दु । वयकःलिसें रिदम ब्यान्डया दुजःपिं रिकि शाक्य, विकि शाक्य, रोजन कायस्थ, लिजेन्द्र महर्जन (झाँक्री), व राजीप बज्राचार्य (लाखे) क्वारेन्टाइनय् च्वनाच्वंगु खः ।
सकलसिनं माःगु सावधानी नालाः च्वनाच्वनागु रिदम ब्यान्डका लाखेय् राजीप बज्राचार्यं धाल । थम्हं हे नसाज्वलं थुइगु, यचुपिचुया माःकथंया उपायत लिनाः थःपिं च्वनाच्वनागु वयकलं धाल ।
थःपिं अस्ट्रेलिया वनागुनिसें लिहांवयाबलय् नं ह्यान्ड स्यानिटाइजर, अलकोहल टिस्यू आदि दक्वं ज्वना हे जुयागु व विमानय् नं थःपिं च्वनेगु सीट अलकोहल टिस्युं सफा यायेगु आदि लिसेंया सफाईपाखे ध्यान बियावयागु बज्राचार्यं धाल ।
तर नेपालय् थ्यंकाः थनया विमानस्थलय् हे थीथी थासं वःपिं दक्व यात्रुतय्त छगः हे बसय् जायक तयाब्यूबलय् थःपिन्सं लिनावयागु सावधानि दक्वं सित्तिं वंथें जूगु धासें गायक बज्राचार्यं दुःख प्वंकादिल ।
न्यासि वनाः गाःगु थासय् तक नं विमानस्थलया व्यवस्थापनं छाय् थथे लापरवाहि याःगु धकाः नं वयलकं न्ह्यसः तयादिल ।
अस्ट्रेलिया लिसें न्यूजिल्यान्डय् तकं कन्सर्ट बीत दिपक व रिदम ब्यान्ड अस्ट्रेलिया वंगु खः । अस्ट्रेलियाय् वयकःपिन्सं ३ कन्सर्ट बी लात ।
लिपा उखे ज्याझ्वः यायेगु स्थिती मदयेधुंकाः ग्वसाः खलकं ल्यं दुगु ज्याझ्वः स्थगित याःगु खः । व धुंकाः दिपक व रिदम ब्यान्ड नेपाल लिहांवःगु खः ।
Categorized in मनोरन्जन
