आः म्याराडोया छेँ म्युजियम
प्रजित शाक्य | कछलाथ्व चौथि ११३७ (नोभम्बर ३ २०१६)
अर्जेन्टिनाया राजधानी ब्युनस आयर्सय् च्वंगु म्याराडोनाया छेँ आः म्युजियमय् ह्यूगु दु ।
म्याराडोनाया जीवन खुल्ला सफू धायेगु याःसां वयागु जीवनया प्रकाशय् वःगु, मवःगु यक्व खँत उगु म्युजियमपाखें सीकाकाये फैगु धाःगु दु ।
म्यूजियम चाःहिलेबलय् छेँया मूलुखा पुलाकथं हे आगन्तुक म्याराडोनाया न्हापाया जीवनया कल्पनाय् थ्यनी । म्याराडोनाया ल्यायम्हबलय् यक्व किपा, कागजात व थीथी सामानं अवलोकनकर्तातयत म्याराडोनाया भूतकालया कल्पनाय् थ्यंकी ।
सन् १९८६या मेक्सिको विश्वकपय् अर्जेन्टिनायायात विश्वकप च्याम्पियन दयेकाः म्याराडोनाया नां हलिमय् चर्चाया शिखरय् थ्यंगु खः । सन् १९८६स जूगु उगु विश्वकप फुटबलय् असाधारण रुपं विपक्षीतयत छले यानाः म्याराडोनां याःगु गोलयात सकसिनं आःतक्क नं ल्वःमंके मफुनि ।
तर अर्जेन्टिनाया सरकारं म्याराडोनायात उगु छेँ विश्वकपया च्यादँ न्ह्यः बीधुंकूगु खः । उगु इलय् छम्ह ल्यायम्हम्ह कासामियात थथे सुविधा बिइगु धइगु हे दुर्लभ धाःसां ज्यू । सरकारं उपलब्ध याकूगु थुगु सुविधा धुंकाः ब्यूनस आयर्सया गरीब बस्ती भिल्ला फियोरिटों बाय् हिलाः म्याराडोनाया परिवार मध्यमवर्गीय परिवारया च्वनीगु बस्तीइ वःगु खः ।
अथेला थुगु छेँया स्वामित्व म्याराडोनायाके मदु । अर्जेन्टिनाया पूर्व मेनेजर अल्बर्टो पेरेज उगु छेँ अथवा म्युजियमया थुवाः खः । सन् १९८१स पेरेजं पनेत गुलि कुतः यातं नं म्याराडोनां थःगु छेँ छम्ह मिसायात मियाब्यूगु खः ।
च्यादँ न्ह्यः वहे मिसालिसे पेरेजं छेँ न्यानाकाःगु खः । उबलेनिसें हे पेरेजं म्याराडोनाया फर्निचर लिसे मेमेगु सामग्री मुनाच्वंगु दु ।
५५दँ दुम्ह म्याराडोना अर्जेन्टिनाया क्लब बोका जुनियर्सपाखेँ म्हितूगु इलय् ब्युनस आयसया ला पार्टेनल धैगु थासय् दुगु उगु छेँय् म्याराडोना च्वंगु खः । सन् १९७०या दशकया लिपाया दँधुंकाः म्याराडोना थः परिवारलिसे थुगु छेँय् च्वंगु खः ।
Categorized in कासा
