आः स्वास्थ्यकःमिपिन्त ल्हाः वात धाःसा २दँनिसें ५दँतक्क जेल सजाय
कछलागा एकादशी ११४१,जेष्ठ २३ आईतवाः
स्वास्थ्यकःमिपिन्त ल्हाः वायेगु व दायेगु ज्याः यात धाःसा २दँनिसें ५दँतक्क जेल सजाय जुइगु व्यवस्थालिसें अध्यादेश जारी जूगु दु ।
राष्ट्रपति विद्यादेवी भडारीं आइतबाः स्वास्थ्यकःमि लिसें स्वास्थ्य संस्थाया सुरक्षा सम्बन्धी अध्यादेश २०७८ जारी यानादिगु खः ।
अध्यादेश कथं स्वास्थ्यकःमि लिसें स्वास्थ्य संस्थाय ज्याः यानाच्वंपिं कर्मचारीयात ल्हाः वायेगु वा छुं नं कथंया धम्की बिइगु, घाःपाः यायेगु, म्हूतु ल्हायेगु, मिं च्याकेगु थें जाःगु ज्याः यात धाःसा २दँ निसें ५दँतक्क जेल सजाय जुइगु व २गू निसें ५गू लखः ध्येबा जरिवाना जुइगु अध्यादेशय् न्ह्यथनातःगु दु ।
लिपांगु दिंलय् वासः यायेत जानाच्वंपिं चिकित्सक लिसें स्वास्थ्यकःमिपिन्त ल्हाःवायेगु घटना अप्वःसेंलि सरकारं अध्यादेश हःगु खः ।
Categorized in राष्ट्रिय
