आईपीएल क्रिकेटय् मुम्बई नं राजस्थानयात बुकल
ञंलागा औंसी ११४१, असोज २० बुधवाः
ईन्डियन प्रिमियर लिग (आईपीएल) टी–ट्वेन्टी क्रिकेटय् मुम्बई इन्डियन्सं राजस्थान रोयल्सयात ८ विकेटं बुकूगु दु ।
युएईया सारजाहलय् म्हिगः जूगु कासाय् राजस्थानं ब्यूगु ९१ रनया आज्जु मुम्बईं ८ ओभर २ बलय् २ विकेट तंकाः पूवंकल । मुम्बईयात त्याकेत इशान किशनं अविजित ५० रन दयेकल ।
बलिङय् राजस्थानया मुस्ताफिजुर रहमान व चेतन साकरियां १÷१ विकेट काल । कासाय् न्हापां ब्याटिङ याःगु राजस्थानं २० ओभरय् ९ विकेट तंकाः ९० रन जक दयेकूगु खः । उकिया लागिं इर्भिन लेविसंं दक्कले अप्वः २४ रन दयेकल ।
मुम्बईया नाथन कुल्टर नायलं ४ विकेट काल । कासा त्याःगुलिसें मुम्बईं प्ले अफय् थ्यनेगु सम्भावना म्वाकातःगु दु । १३ कासां १२ ल्याः मुंकूगु मुम्बई धलःया न्यागूगु थासय् थहांवंगु दु ।
१० ल्याः मुंकूगु राजस्थान न्हय्गूगु थासय् दु ।
Categorized in कासा
