आदिवासी जनजाति महासंघय् गुरुङ्ग
लहनान्युज | यंलागा षष्ठी ११३९ (सेप्तेवर २० २०१९)
नेपाल आदिवासी जनजाति महासंघ(नेफिन) जिल्ला समन्वय परिषद मकवानपुरया अधिवेशनय् सर्वसहमतं न्हुगु कार्यसमिति ल्यःगु दु ।
हेटौंडाय् जुगु उगु स्वक्ःगु अधिवेशनं जंगबहादुर गुरुङ्गया अध्यक्षताय् १२ म्ह दुजः दुगु कार्यसमिति गठन जुगु खः ।
उगु न्हुगु ज्यासना पुचलय् उपाध्यक्षय् खेमबहादुर चेपाङ, लिलाकुमार घलान व शिलु कुमाल, सचिव भीम भुजेल, कोषाध्यक्ष पदमराज राई, सहसचिव बिसलाल खड्गी, सीसम माझी व एकबहादुर आले मगर व दुजलय् हरिलाल चौधरी, बिरबहादुर बोटे, प्रल्हाद राई दनुवार च्वनादिगु दु ।
उगु ज्याझ्वलय् प्रदेश ३ या आन्तरिक मामिला तथा कानुनमन्त्री शालिकराम जम्कट्टेल मूपाँहा जुया झायादिगु खः अथेहे, प्रदेश सांसद ओम घलान, संघीय परिषदका कार्यवाहक महासचिव
सुरविर थामी, नेपाल आदिवासी जनजाति महासंघ, प्रदेश ३ या संयोजक काजीमान तामाङपिं पाहा कथं झायादिगु खः ।
ज्याझ्वलय् आदिवासी जनजाति ख्यलय् महत्वपूर्ण योगदान दुम्ह ‘आलु र तामा हजुर’ म्ये हालामि लोकगायक सोमबहादुर लामायात न सम्मान याउगु खः । नेफिन मकवानपुरया अध्यक्ष तिर्थबहादुर थापा मगरया सभाध्यक्षताय् जुगु ज्याझ्वलय् सचिव कृष्णशरण जोशीं प्रगति प्रतिवेदन व कोषाध्यक्ष खेमबहादुर चेपाङं आर्थिक प्रतिवेदन न्ह्यब्बःगु खः ।
नेपाल मगर संघया केन्द्रीय सदस्य अशोक सारु मगर, नेपाल आदिवासी जनजाति महासंघ मकवानपुरया उपाध्यक्ष जानकी चौधरी, सल्लाहकार मधुकरसिं गलामी मगर, भुजेल समाज सेवा समिति मकवानपुरया अध्यक्ष ध्रुबबहादुर भुजेलपिन्स न भिंतुना न्वचु तयादिगु खः ।
