आनन्दकुटी आइसोलेशनयात चु जी फाउण्डेशनया ग्वाहालि
लहनान्यूज | बछलागा एकादशी ११४१,जेष्ठ २३ आईतवाः
चु जी फाउण्डेसन, ताइवान (TZU CHI FOUNDATION) पाखें आनन्दकुटी बिद्यापीठ, स्वयम्भुयात अटो क्लेभ मेसिन, पोर्टेबल एक्सरे मेसिन व ईसीजी मेसिन ग्वाहालि याःगु दु ।
फाउण्डेशनयापाखें मैत्री महास्थवीर व मुकुन्द बिष्टं आनन्दकुटी आईशोलेसन सेन्टरयात उगु ग्वाहालि देछाःगु खःसा सेन्टरपाखें थुगु आइसोलेशनया संरक्षक, येँ क्षेत्र नं. ८ या सांसद जीवन राम श्रेष्ठं ग्वाहालि लःल्हानाकयादीगु खः ।
५० बेड क्षमताया आइसोलेशन सेन्टरय् थुबलय् २३ म्ह च्वनाच्वनादीगु दुसा आःतक २५ सिनं थुगु आइसोलेशनय् च्वनाः कोभिड १९ यात त्याकाः डिस्चार्ज जुयादीधुंकूगु दु ।
काठमाडौं महानगरपालिका १५ वडा व स्थानियवासीया ग्वाहालिइ न्ह्यानाच्वंगु अक्सिजनसहितया आइसोलेशनया नितिं आनन्दकुटी बिद्यापीठं थाय् बियाः ग्वाहालि याःगु खः । मोडेल हस्पिटल नर्सिङ्ग कलेजया मेडिकल टिमं २४ सै घण्टा डाक्टर, नर्सया सेवा बियाः वयाच्वंगु दुसा एक्सरे, ईसीजी, कोरोना संक्रमित जूम्हेसिया सकल छेँजःपिनिगु पीसीआर टेष्टया ब्यवस्था, पोषणंजाःगु नसात्वँसानापं दक्वं सुबिधा निःशुल्क सेवा बियाः वयाच्वंगु दु ।
थुगु आइसोलेशनय् च्वनाः लंकाः छेँय् वनीपिनिगु नितिं अक्सिमिटर, थर्मोमिटर, सेनिटाइजर, मास्क, कोभिड बुकलेट व माःगु वासः निःशुल्क बियाः वयाच्वनागु खँ कनादिसें संरक्षक श्रेष्ठं फाउण्डेशनया हःपा, तिबः व ग्वाहालिया नितिं थःपिं कृतज्ञ जुयागु न्ह्यथनादिल ।
थ्वसिबें न्ह्यः नं फाउण्डेशनं न्यागू अक्सिजन कन्सनट्रेटर व मेमेगु थीथी ज्वलं ग्वाहालि यायेधुंकूगु दु ।
