आरक्षणया सन्दर्भय् महत्वपूर्ण आदेश पिहाँवल
लहनान्यूज | दिल्लागा नवमी ११४१, साउन १८ मंगलबाः
नेपालय् २०६३ सालया अन्तरिम संविधानलिसें न्ह्याःगु जातीय अले वर्गीय आरक्षणया सन्दर्भय् महत्वपूर्ण आदेश वःगु दु ।
धनुषाया विनयकुमार पंजिकारं चिकित्सा शिक्षाया उच्च शिक्षाय् आरक्षणया माग यासें दायर याःगु रिट निवेदनय् फैसला न्यंकेगु झ्वलय् सर्वोच्चं जातीय वा वर्गीय आधारया आरक्षणत चीकेत आदेश ब्यूगु खः ।
न्यायाधीशद्वय दीपकुमार कार्की व डा. आनन्द मोहन भट्टराईया मंकाः इजलासं वंगु पुस १ गते याःगु फैसलाया पूर्णपाठय् आर्थिक रुपं सम्पन्न व आरक्षण चूलानाः थःगु अवस्था भिंकेधुंकूपिन्त हाकनं अज्याःगु सुविधा मदइगु कथं कानून दयेकेत आदेश ब्यूगु दु ।
अथे हे, आरक्षणयात वर्गीय वा जातीय आधारय् मखसें ह्वःतालं छखे लाःपिनिगु उत्थानया लागिं आवश्यकताया आधारय् जक छ्यलेत नं सर्वोच्चया आदेशय् धयातःगु दु । आरक्षण सम्बन्धी व्यवस्थायात वर्गीयता वा जातीयताय् मखसें आवश्यकता केन्द्रित दयेकूसा जक थुकिं संविधानया साध्य ल्हातय् लाके फइगु, वास्तवय् हे गरिब, निमुखा व थःगु श्रोत साधनं शिक्षा आर्जन यायेमफूगु वर्गयात हे आरक्षणया चाकः दुने हयेगु वसंविधानया धारा १८ (३) या प्रतिबन्धात्मक वर्गय् लाःगु तर सक्षमयात बाहेक याःसा जक थुकिं संविधानया आज्जुयात ली फइगु धकाः आदेशय् धयातःगु दु ।
अथे हे, फैसलां राजनीतिक, आर्थिक वा सामाजिक रुपं उपलब्धि ल्हातय् लाकेधुंकूगु समुदाययात आरक्षणया सुविधां पिने तयेत नं आदेश ब्यूगु दु । आदेशय् आर्थिक रुपं सक्षम जुयाः नं आरक्षणया सुविधान कायेत स्वइगु वर्गयात ‘तरमारा’ धकाः किटान याःगु दु ।
आदेशय् संविधानतः आरक्षणया वर्गय् लाःगु तर व्यक्तिगत उन्नति प्रगति यायेधुंकूगु हुनिं आरक्षण वा उपल्लो अले तरमारा मध्यम वर्गया कब्जां आरक्षण सम्बन्धी व्यवस्थायात मुक्त याये जरुरी दुगु धकाः नं आदेशय् न्ह्यथनातःगु दु । सर्वोच्चया आदेशं छक्वः आरक्षणया सुविधा काःम्ह मनूयात हाकनं अज्याःगु सुविधा मबीत व समक्षलिसे हे धेंधें बल्लाः याके फइगु नं धयातःगु दु ।
अथे हे, आरक्षण बीबलय् शिक्षाया गणुस्तर कायम दइगु कथं कानुन तर्जुमा यायेत नं निर्देशनात्मक आदेश ब्यूगु दु । सर्वोच्चं रीट निवेदक पञ्जिकारं चिकित्सा शिक्षाया स्नातकोत्तर (पिजी) तगिमय् तकं जातीय आधारय् आरक्षण बीमाःगु धकाः याःगु मागयात अस्वीकार याःगु दु ।
Categorized in राष्ट्रिय
