आरडीटी परीक्षणपाखें हेटौंडाय् प्यम्हेसिके पोजिटिभ
लहना न्यूज | ने.सं. ११४० चौलागा नवमि (१६ अप्रिल २०२०), विहिवाः
र्यापिड डायग्नोस्टिक टेष्ट (आडीटी) किटपाखें कोरोना भाइरसया एण्टिबडी परीक्षण याःगु इलय् हेटौंडाय् प्यम्हेसिके पोजिटिभ रिपोर्ट वःगु दु । हेटौंडा उप–महानगरपालिकाय् जूगु र्यापिड टेष्टय् प्यम्हेसिके पोजिटिभ खनेदुगु खः । हेटौडा–४ बासुदेव सभागृहस याःगु र्यापिड टेष्टय् प्यम्हेसिके पोजिटिभ वःगु जिल्ला स्वास्थ्य कार्यालय हेटौंडाया प्रमुख प्रणय उपाध्यायं जानकारी बियादिल । बासुदेव सभागृहस जूगु पीम्हेसिगु टेष्टय् छम्ह मिसा व स्वम्ह मिजंपिंके रिपोर्ट पोजिटिभ वःगु टेष्ट यायेगु ज्याय् दुथ्याःम्ह मेलानया केन्द्रीय सचिवालय दुजः उत्सव चौलागाईं धयादिल ।
उपिं मध्ये भारतया बिहार छेँ जुयाः थौंकन्हय् हेटौंडा–४य् थःथितिपिन्थाय् च्वना वयाच्वंम्ह ५५दँया छम्ह मिसा, भारत वनाः लिहां वःम्ह हेटौंडा–२या ६७दँया छम्ह ज्याथःम्ह, भारत बैंग्लोरपाखें लिहां वःम्ह हेटौंडा–५या २४दँ दुम्ह छम्ह ल्याय्म्ह व साउदी अरबपाखें लिहां वःम्ह ३२दँ दुम्ह छम्ह मिजंम्ह खः ।
पिसीआर जाँचया नितिं स्वाब कायेत हेटौंडा अस्पताल यंकूगु दु । उगु स्वाब हेटौंडा–१०य् च्वंगु किटजन्य रोग अनुसन्धान तथा तालिम केन्द्रया ल्याबय् परीक्षण जुइगु धाःगु दु । अथे हे, हेटौंडा–१५य् याःगु र्यापिड टेष्टय् धाःसा फुक्कसिगु नेगेटिभ लूगु दु ।
र्यापिड टेष्टय् पोजिटिभ लूपिनिगु छेँजः अथे हे नियमित स्वापुतिइ वःपिनिगु नं स्वाब संकलनया नितिं अस्पताल यंकूगु दु । थःपिन्त पोजिटिभ खनेदुपिन्सं नं परीक्षणय् ग्वाहालि याःगु उपाध्यायं जानकारी बियादिल ।
बागमती प्रदेश सरकारया ग्वाहालिइ मकवानपुर जिल्लाय् स्वसःगू किटपाखें परीक्षण जुयाच्वंगु दु । न्हापांगु चरणय् विदेशपाखें लिहांवःपिं व जिल्लाया थीथी थासय् दुगु क्वारेन्टाइनय् च्वनाच्वंपिनिगु परीक्षण जुयाच्वंगु दु ।
Categorized in राष्ट्रिय
