आराध्यालक्ष्मी चिहाकःगु संकिपा सरस्वति पिहावल
नृपेन्द्रलाल श्रेष्ठ | ञंलाथ्व ११ ११४०,भाद्र १३ सनिवाः
यादवदास भ्वछिभोयाया निर्देशनय् थौंकन्हय लोकह्वाःम्ह कलाकार आराध्यालक्ष्मी खड्गीया म्हिता दिगु मिखा दान सम्बन्धि जनचेतनामूलक चिहाकःगु संकिपा ...सरस्वति... युट्युबय् सार्वजनिक याःगु दु ।
आराध्यालक्ष्मी खड्गीया मू भूमिकाय् दुुगु थुगु संकिपा एभीसिडी पोखरा युट्युबय् सार्वजनिक याःगु थुगु संकिपा निगु भाषं दयेकातःगु खः ।
सामाजिकक्रिया नेपालया न्ह्यब्वयाय् जनचेतनामूलक संकिपा ...सरस्वती... मिखा दानलिसे स्वापू दूगु खःसा थुके दुर्घटनावश मिखां मखंसां थौंया इलय् वासः यायेफइ धैगु अतिकं महत्वपूर्ण सन्देश न्ह्यब्वयातःगु दु ।
थुगु चिहाकःगु संकिपाय् आराध्यालक्ष्मी खड्गी नाप मेपि कलाकारपि कृष्णभक्त भहर्जन, एजन राजभण्डारी व सिम्रिक श्रेष्ठं अभिनय यानातःगु दु । जनचेतनात्मक म्ये कथं थुकी निशा देशार, आनन्द कार्की, सरिता शाही, सुरजकुमार थापा व जिना रसाईलीं हालातःगु दुसा शुभ बहादुर सुनाम व राजु सिंहं थुगु म्येयात लसय् हनातःगु दु ।
थुगु संकिपाय् बाखं, पट्कथा, म्ये लिसें कला निर्देशन आनन्दरत्न बज्राचार्यं यानादिगु खः । निर्देशक यादवदास भ्वछिभोया खः ।
Categorized in मनोरन्जन
