इंग्लिस प्रीमियर लिग फुटबल अन्तरगत लिपांगु कासाय् आर्सनल, साउथ ह्याम्प्टन व स्टोक सिटी त्याःगु दु । म्यानचेष्टर युनाइटेड धाःसा वेष्टह्यामलिसे बराबरी कासा म्हितेमाल । कासाय् आर्सनलं वर्नमाउथयात ३–१ गोलं बुकूगु इलय् साउथ ह्याम्प्टनं एभर्टनयात छगू गोलं बुकूगु दु । थुुगु कासा त्याय्वं आर्सनल २८गू ल्याः कयाः प्यंगू थासय् लाःगु दु ।

मेखे वाटफोर्ड धाःसा स्टोक सिटीलिसे छगू गोलं बुत । न्ह्यानाच्वंगु लिगय् स्टोक सिटीया थ्व प्यंगूगु जीत खः । नापं १६गू ल्याः लिसें धलखय् ११ गूगु थासय् थाहांवःगु दु ।

प्रीमियर लीगय् १३गूगु चरणया कासा क्वचाःगु इलय् चेल्सी ३१गू ल्याः लिसें शीर्षथासय् लानाच्वंगु दु । निगूगु व स्वंगूगु थासय् लानाच्वंगु लिभरपुल व म्यानचेष्टर सिटीया ल्याः समान ३०गू थ्यनाच्वंगु दु । अथेहे हलसिटी, स्वान्सी व सण्डरल्याण्ड धाःसा रेलिगेसन क्षेत्रय् लानाच्वंगु दु ।

Categorized in कासा