आवंलि वरिष्ठ न्वकू स्वतः नायः
लहनान्यूज सम्वाददाता | कौलागा पञ्चमि ११३६ (अक्टोबर २० २०१६)
नेपाल उद्योग वाणिज्य महासंघय् आवंलि वरिष्ठ न्वकू स्वतः नायः जुइगु जूगु दु ।
महासंघया विहीबाः राजधानीइ क्वचाःगु विशेष साधारणसभां महासंघया विद्यमान विधान २०४९या खुक्वःगु संशोधन यानाः वरिष्ठ न्वकू स्वतः नायः जुइगु व्यवस्था याःगु खः । थ्व धुंकाः थौंकन्हयया वरिष्ठ न्वकू भवानी राणा आः साधारणसभा धुंकाः स्वतः नायः जुइगु निश्चित जूगु दु ।
विशेष साधारणसभाय् ९० प्रतिशत प्रतिनिधिपिन्सं विधान संशोधनया पक्ष काःगु खः ।
येँय् पत्रकार सम्मेलन यासें नायः पशुपति मुरारकां विशेष साधारणसभां विधान संशोधन यानाः न्हूगु व्यवस्था याःगु विषयस जानकारी बियादिल । नायः मुरारकां ७ प्रदेशय् प्रादेशिक उद्योग वाणिज्य संघया व्यवस्था जूगु, वरिष्ठ न्वकू खुला धेंधें बल्लाखं ल्यइगु जानकारी नं बियादिल ।
- खुम्ह पूर्वनायःपाखें वहिष्कार
थ्व हे दथुइ महासंघया खुम्ह पूर्वनायःपिन्सं धाःसा विशेष साधारण सभाया वहिष्कार याःगु दु ।
नेपाल उद्योग वाणिज्य महासंघया नायःयात सम्बोधन यासें पौ च्वयाः खुम्हेसिर्न औपचारिक जानकारी मदुगु धासें विशेष साधारण–सभाय् उपस्थित जुइमफइगु धाःगु खः । पतिइ पूर्वनायःपिं महेशलाल प्रधान, पदम ज्योती, आनन्दराज मुल्मी, प्रदीपकुमार श्रेष्ठलिसें विनोदबहादुर श्रेष्ठ व कुशकुमार जोशीया ल्हाःचिं दु ।
पतिइ थीथी माध्यमं विधान संशोधन यायेत विशेष साधारण–सभा जुइत्यंगु जानकारी दुसां विधान संशोधन प्रक्रियाय् पूर्वनायःया हैसियतं व्यक्तिगत व सामूहिक रुपं छ्याता कायेगु व सहलह मयाःगु धयातःगु दु ।
‘२०७३ कात्तिक ४ गते जुइगु विशेष साधारण–सभाय् ब्वति कायेत परम्परानिसें पूर्व नायःपिन्त उपस्थितिया लागिं ब्वना वयाच्वंगुलिइ थुगुसी अथे छुं हे कथं ब्वंगु मदुगुलिं उपस्थित जुइ मफइगु व्यहोरा विशेष साधारण–सभाय् न्यंकाबियाः जानकारी याकेत नं इनाप याये’ पतिइ धयातःगु दु ।
नायः मुरारकां धाःसा पत्रकार सम्मलेनय् नवासें ६ पूर्वनायःपिन्सं विशेष साधारणसभा बहिस्कार याःगु दुःखं जाःगु धयादिल । पूर्वनायः रविभक्त श्रेष्ठं ६ पूर्वनायःपिन्सं ब्यूगु विशेष साधारणसभाबारे जानकारी मदुगु धइगु द्वपंया खन्डन यासें विशेष साधारणसभां क्वःछीगु खँत थःपिन्त मान्य जुइगु जानकारी पूर्वनायःपिन्सं थःत ब्यूगु धयादिल ।
Categorized in राष्ट्रिय
