इंग्लीश प्रिमियर लिगय् आर्सनलं टोटनह्यामयात ३गू–१गूया गोल अन्तरं बुकल
ञलागा षष्ठी ११४१, असोज ११ सोमबाः | ञलागा षष्ठी ११४१, असोज ११ सोमबाः
इंग्लीश प्रिमियर लिग फुटबलय् आर्सनलं टोटनह्याम हट्सपरयात ३गू–१गूया गोल अन्तरं बुकुगु दु ।
वंगु चान्हय् आर्सनलया मैदानय् जूगु लण्डन डर्बीइ घरेलु टोलीयात त्याका बिइत एमिले स्मीथ रोवे, पिएरे एमरिक औबामायङ्ग व बकायो साकां छगू छगू गोल याःगु खः ।
बूगु टोली टोटनह्यामया ह्युङ मिन सनं छगू गोल याःगु खः । कासा त्यायेधुंका आर्सनल ६ गू कासां ९ गू ल्याः मुना ल्याः धलःया १०गूगु थासय् थ्यंगु दु । लिगय् सुरुवाती ३गू कासा बूगु आर्सनलं वयांलिपा धाःसा मदिक्क ३गू कासा त्याकुगु दु ।
उखे सुरुवाती ३गू कासाय् जित ल्हातय् लाकुगु टोटनह्याम हट्सपर धाःसा वयांलिपाया ३गू कासाय् मदिक्क बुइमाःगु दु । प्रिमियर लिगया हे मेगु कासाय् वुल्भरह्याम्पटन वान्डरर्सं साउथह्याम्पटनयात उमिगु हे मैदानय् १गू–०या गोल अन्तरं बुकुगु दु ।
कासाय् वुल्भरह्याम्पटनया राउल जिमिनेजं निर्णायक गोल याःगु खः । इंग्लीश प्रिमियर लिगय् ६गूगु चरणया कासा क्वचाबलय् १४गू ल्याःलिसें लिभरपुल शिर्ष थासय् दु ।
१३गू–१३गू ल्याः मुंकुगु म्यान्चेस्टर सिटी, चेल्सी, म्यान्चेस्टर युनाइटेड व एभर्टन छसिकथं निगूगु निसें ५गूगु थासय् दु ।
Categorized in कासा
