इंग्लीश प्रिमियर लिग फुटबलय् शिर्ष क्लबत म्यान्चेस्टर सिटी, चेल्सी, आर्सनल व टोटनह्याम हट्सपरं याउँक चिज चूलाकुगु दु ।

वंगु चान्हय् जूगु कासाय् शीर्ष थासय् दूगु म्यान्चेस्टर सिटीले लेष्टर सिटीयात ६गू–३ग्रूया गोल अन्तरं बुकल । म्यान सिटीया नितिं राहिम स्टर्लीङं निगू गोल याःबलय् केभिन डे ब्रायन, रियाद माहारेज, इके गुन्डोगान व आयमेरिक लापोर्तें छगू छगू गोल याःगु खः ।

लेष्टर सिटीया म्याडिसन, लुकम्यान व इहिनाचों छगू छगू गोल याःगु खः । वंगु चान्हय् जूगु मेगु कासाय् चेल्सीं एस्टन भिल्लायात ३गू–१गूया गोल अन्तरं बुकुगु खः । चेल्सीया जर्गिनों निगू लिसें रोमेलु लुकाकुं छगू गोल याःबलय् चेल्सीया हे जेम्सं छगू आत्माघाति गोल याःगु खः ।

प्रिमियर लिगया हे मेगु कासाय् आर्सनलं नरिच सिटीयात ५गू–०या तःधंगु गोल अन्तरं बुकल । आर्सनल त्यागुलिइ बकायो साकां निगू्र गोल याःगु खःसा किरण टिएर्नी, अलेक्जेण्डर लाकाजेट् व एमिले स्मीथ रोवें छगू छगू गोल याःगु खः ।

अथेहे टोटनह्याम हट्सपरं क्रिष्टल प्यालेसयात ३गू–०या गोल अन्तरं बुकुबलय् साउथह्याप्टनं वेष्ट ह्याम युनाइटेडयात ३गू–२गूया गोल अन्तरं व ब्राइटनं ब्रेन्टफोर्डयात २गू–०या गोल अन्तरं बुकुगु दु ।

लिभरपुल व लिड्स युनाइटेड, वुल्भरह्याम्पटन व वाट्फोर्ड लिसें बर्न्ले व एभर्टन दथुया कासा धाःसा कोभिडया हुनिं पोस्टपोन्ड जूगु दु । 

वंगु चान्हय्सिया कासालिपा प्रिमियर लिगया ल्याः धलःखय् म्यान्चेस्टर सिटीं ६ गू ल्याः लिसें अग्रता काःगु दु । १९ गू कासां सिटीया ४७गू ल्याः जूगु दु  ।

छगू कासा म्हो म्हितुगु लिभरपुल व १९गू कासा म्हितुगु चेल्सीया उतिग्यंक ४१ गू ल्याः दु । ३५गू ल्याः मुंकुगु आर्सनल ४गूगु थासय् दु ।

Categorized in कासा