२०७८ माघ ५, बुधबार

इंग्ल्याण्डं पाकिस्तानविरुद्धया क्रिकेट श्रृंखला त्याकल

ञलाथ्व प्रतिपदा ११४१, असोज ५ मंगलबाः

इंग्ल्याण्डं पाकिस्तानय् म्हितेगु क्वःछ्यूगु क्रिकेट श्रृंखला रद्द याःगु दु ।
 
इंग्ल्याण्ड अले वेल्स क्रिकेट बोर्डं म्हिगः छगू विज्ञप्ती जारी यासें मेगु लाय् पाकिस्तानय् जुइगु धयातःगु श्रृंखला रद्द याःगु खः । निन्हु न्ह्यः जक हे न्युजिल्याण्डं नं सुरक्षा जोखिम क्यनाः पाकिस्तानविरुद्धया श्रृंखला रद्द याःगु खः ।
 
इंग्ल्याण्डं सन् २००५ लिपा न्हापांगु खुसी पाकिस्तान भ्रमण यायेगु धलः दयेकूगु खः । पाकिस्तान अले अफ्गानिस्तानय् अप्वयाच्वंगु राजनीतिक अस्थिरता व थुगु क्षेत्रया संभावित सुरक्षा जोखिमयात बिचाः यानाः भ्रमण रद्द यानागु इंग्ल्याण्डं न्ह्यथंगु दु ।
 
हिंसाग्रस्त क्षेत्रया भ्रमणं नकतिनि हे कोभिड महामारीं थहां वयाच्वंपिं थः कासामितय्त मानसिक दबाब ब्वलनीगु वय्कःया तर्क दु । सन् २००९ लय् श्रीलंकाया क्रिकेट टोली गयाच्वंगु बसय् पाकिस्तानय् बन्दुकधारीतय्सं हताः यायेधुंकाः अन अन्तराष्ट्रिय क्रिकेट जुइगु द्यूगु खः ।
 
सन् २०१५ निसें छुं देशं पाकिस्तानया भ्रमण याःसां तःधंगु टेष्ट राष्ट्रत आः नं पाकिस्तान भ्रमण यायेत लिचिलाच्वंगु दु । व धुंकाः पाकिस्तानं थःगु होम म्याच युनाईटेड अरब इमिरेट्सय् म्हितावःगु दु ।
Categorized in कासा