इंग्ल्याण्ड, क्रोएसिया व चेक रिपब्लीक युरोकप फुटबलया नक आउट चरणय्
बछलाथ्व चर्तुदशी ११४१, असार ९ बुधबाः
युरोकप फुटबलय् वंगु चान्हय् जूगु कासाय् इंग्ल्याण्ड व क्रोएसिया त्यागु दु ।
लण्डनस्थित वेम्बले रंगशालाय् जूगु कासाय् इंग्ल्याण्डं चेक रिपब्लीकयात १–०या गोल अन्तरं बुकुगु दु । इंग्ल्याण्डया नितिं राहिम स्टर्लीङं निर्णायक गोल याःगु दु । थुगु हे पुचःया मेगु कासाय् क्रोएसियां स्कटल्याण्डयात ३–१गूया गोल अन्तरं बुकल ।
क्रोएसिया त्यागुलिइ निकोला भ्लासिच, लुका मोड्रिच व इभाँ पेरिसिचं छगू छगू गोल दुथ्यागु दु । वंगु चान्हय्सिया कासालिपा पुचः ‘डी’ पाखें पुचः त्याकामि इंग्ल्याण्ड, ल्यु त्याकामि क्रोएसिया व ३गूगु थासय् लाःगु चेक रिपब्लीक नं राउण्ड अफ सिक्सटिनय् थ्यंगु दु ।
युरोकप फुटबलय् थौं पुचः चरणया कासात क्वचाइ । पुचः ‘इ’ व ‘एफ’ या लिपांगु ४गू कासा थौं जुइत्यंगु दु । बहनि ९ ता ई जुया ४५ गू मिनेटय् स्विडेन व पोल्याण्ड अले स्लोभाकिया व स्पेन दथुइ कासा जुइ ।
अथेहे चान्हय् १२ ता ई जुया ४५ गू मिनेटय् फ्रान्सं पोर्चुगललिसे म्हितिइबलय् जर्मनीं हंगेरीनाप धेंधेंबल्ला याइ । थौया कासालिपा राउण्ड अफ सिक्सटिनय् ल्यं दनिगिु लिपांगु ४गू टोलीया क्वजिइज्या जुइ ।
आः तक्क इटाली, बेल्जियम, नेदरल्याण्ड्स, इंग्ल्याण्ड, वेल्स, डेनमार्क, अष्ट्रिया, क्रोएसिया, स्वीट्जरल्याण्ड, चेक रिपब्लीक, फ्रान्स व स्विडेन नक आउट चरणय् थ्यनेधुंकुगु दु ।
Categorized in कासा
