इंग्ल्याण्ड व स्कटल्यान्ड लिसें क्रोएसिया व चेक रिपब्लिकं ज्वलिन्जवः
बछलाथ्व, नवमी ११४१, असार ५ शनिबाः
युरो कप फुटबलय् थौं नं ३गू कासा जुइत्यंगु दु । थौंया कासाय् स्पेन व पोल्याण्ड, हंगेरी व फ्रान्स अले पोर्चुगल व जर्मनी दथुइ धेंधेंबल्ला जुइ ।
थ्वयान्ह्यः म्हिगः जूगु कासाय् इंग्ल्याण्ड व स्कटल्यान्डं ज्वलिन्ज्वः म्हिता ल्याः इनाकाःगु दु । वंगु चान्हय् जूगु कासाय् इंग्ल्याण्ड व स्कटल्यान्डं गोल मयासें ज्वलिन्ज्वः कासा म्हितुगु खः । पुचः ‘डी’ लय् दूगु इंग्ल्याण्डया निगू कासाय् ४गू ल्याः जूगु दु । स्कटल्यान्डं धाःसा निगू कासाय् छगू ल्याः मुंगु दु ।
अथेहे वंगु चान्हय् हे जूगु निगूगु कासाय् क्रोएसियां चेक रिपब्लिकलिसे ज्वलिन्ज्वः म्हिता ल्याः इनाकाःगु दु । निगुलिं टोलीं छगू छगू गोल याना कासा ज्वलिन्ज्वः म्हितुगु खः । कास ज्वलिन्ज्वः जूगु नापं पुचः ‘डी’ लय् दूगु क्रोएसियां निगू कासाय् छगू ल्याः मुना ३गूगु थासय् दु । निगू कासाय् ४गू ल्याः मुंगु चेक रिपब्लिक पुचःया शीर्ष थासय् दु ।
अथेहे म्हिगः जूगु न्हापांगु कासाय् स्वीडेनं स्लोभाकियायात बुकुगु दु । सेन्ट पिटर्सबर्गय् जूगु कासाय् स्विडेनं स्लोभाकियायात छगू शुन्यया गोल अन्तरं बुकुगु खः ।
Categorized in कासा
