इङ्लाइण्डयात बुका न्युजिल्याण्ड आईसीसी टी–ट्वान्टी विश्वकप क्रिकेटया फाइनलय् थ्यंगु दु । युएइया अबुधाबीइ म्हिगः जूगु सेमिफाइनल कासाय् इङ्ल्याण्डयात ५गू विकेटं बुका न्युजिल्याण्ड विश्वकपया फाइनलय् थ्यंगु खः ।

टर त्याका फिल्डिङ ल्यःगु न्युजिल्याण्डयात इङ्ल्याण्डं सच्छि व ६७गू रनया आज्जु बिउगुलिइ न्युजिल्याण्डं उगु आज्जु ५गू  विकेट व छगू ल्यं दनिबल् हे पूवंकुगु खः । न्युजिल्याण्ड त्यागुलिइ डेरिल मिसेलं अविजित जुया दक्वःलय् अप्वः ७३ गू रनया योगदान बिउगु दु ।

डेभोन कानवें ४६गू, जेम्स निसामं २७गू रन दयेकुगु खः । इङ्ल्याण्डया क्रिस वाक्स व लाम लिभिङस्टोनं उतिग्यंक २ गू व आदिल रासिदं १गू विकेट काःगु खः । वयान्ह्यः न्हापा ब्याटिङ याःगु इङ्ल्याण्डं क्वजिनातःगु ओभरय् ४ गू विकेट तंका सच्छि व ६६गू रन दयेकुगु खः ।

इङ्ल्याण्डया नितिं मोइन अलीं अर्धशतकीय इनिङ्स म्हितुगु खः । अथेहे , डेविड मलानां ४१गू, जोनी बेयरस्टों १३गू व जोस बटलरं २९गू अले लियाम लिभिङस्टोन १७ गू रन मुंकुगु खः । इयान मोर्गान ४गू रनय् अविजित जुल ।

न्युजिल्याण्डया टिम साउथी, एडम मिल्नी, इश सोढी व जेम्स नासमं उतिग्यक १गू–१गू विकेट काःगु खः । थौं निगूगु सेमिफाइनल अन्तर्गत अष्ट्रेलिया व पाकिस्तान दथुइ कासा जुइत्यंगु दु ।

Categorized in कासा