इङ्ल्यान्डयात पाकिस्तान ५ रनं त्याकल
लहनान्युज | ञंलाथ्व १५ ११४०,भाद्र १७ बुधवाः
इङ्ल्यान्डर व पाकिस्तान दथुइ जुगु स्वगूगु टी ट्वान्टी सिरिज १ या १ बराबरी जूगु दु । म्हिगः चान्ह्य जूगु लिपागु कासाय् पाकिस्तानं इङ्ल्यान्डयात ५ रनं त्याका सिरिज १ या १ बराबरी क्वचाःगु दु ।
पाकिस्तान बिःगु १९१ रनया लक्ष्यय् इङ्ल्यान्डं २० ओभरय् ८ विकेटय् १८५ रन जक दयेकेत तालागु खः । इङ्ल्यान्डया लागि अलराउन्डर मोइन अलिं अर्धशतकिय पारी म्हितगु खःसा कासा त्याकेत तालाके मफुत । अलिं ३३ बलया सामना यासे ४ चौका व ४ छ्क्काया ग्वाहालिं ६१ रनया योगदान बिःगु खः ।
अथेहे टम ब्यान्टन ४६ रन, साम बिलिंग्सं २६ रन व लेविस ग्रेगोरीं १२ व कप्तान इओन मोर्गनं १० दयेकूगु खः ।
पाकिस्तानया लागि शाहिन अफ्रिदि व वाहब रियाजं निगु निगु विकेट काःगु खः सा इमाद वासिम व हरिस रउफं छगू छगू विकेट काःगु खः ।
टस बुया न्हापागु ब्याटिङ याःगु पाकिस्तानं निर्धारित २० ओभरय् ४ विकेटय् १९० रन दयेकूगु खः । पाकिस्तानया लागि मोहम्मद हफिजं ८६ रनया अविजित पालि म्हितिगु खः ।
अथेहे हैदर अलिं ५४ रन, कप्तान बाबर आजमं २१, शादब खानं १५ रन व इमाद वासिम ६ रनय् अविजित जूगु खः । इङ्ल्यान्डया लागि क्रिस जोर्डनं निगु विकेट, मोइन अलि व टम कुरानं छगु छगु विकेट काःगु खः ।
थुगु सिरिज न्हापागु कासा वाः वःगु खःसा निगु कासा इंग्ल्यान्ड ५ विकेटं त्याकूगु खः ।
