इजरायल व प्यालेस्टाइनं युद्धविराम यात
कछलाथ्व एकादशी ११४१,जेष्ठ ८ सनिवाः
इजरायल व प्यालेस्टाइनं युद्धविराम याःगुनाप मानवीय ग्वहालि थ्यंगु दु ।
युद्धविराम जुइवं संयुक्त राष्ट्रसंघीय ग्वहालि निकायमार्फत थीथी दातृ संघसंस्थापिन्सं माःकथंया ग्वहालि यानाच्वंगु दु । ११न्हु तक न्ह्याःगु युद्धलिपा आः वयाः युद्धबिराम जूगु दु ।
अथेजुयाः नागरिकत थःथःगु छेँ लिहाँवनाच्वंगु दु । द्वन्द्वया झ्वलय् १०गू लख मल्याक मनूत विस्थापित जूगु खः । थ्वहे द्वन्द्वय् यक्व हे संरचना ध्वस्त जूगु दुसा मानवीय क्षति न जूगु दु ।
जेरुसेलमया अल अक्का मस्जिदया स्वामित्व सम्बन्धिया कचवं तच्वःगुनाप इजरायल व प्यालेस्टाइनदथुइ युद्ध जूगु खः ।
द्वन्द्वय् २५०म्ह सिबें अप्वः मनुपिनिगु ज्यान वंगुलिं थःपिनिगु जीत जूगु निगू पक्षं दावी याःगु खः । सन् २०१४ थुखेया हे तःधंगु हिंसा धुंका थःपिन्सं जीत हासिल यानागु उमिगु प्रतिक्रिया दु ।
निवाः तक्क न्ह्याःगु युद्धया झ्वलय् भौतिक क्षतिया पुनर्निर्माणया लागि दँदँ मालिगु थीथी दातृ निकायपिन्सं धाःगु दु । रेडक्रसया अन्तर्राष्ट्रिय समिति आईसीआरसीया मध्यपूर्व निर्देशक फेब्रिजियो कार्बाेनीं निवाः दुने जूगु क्षतिया पुनर्निर्माणया लागि यक्व हे दँ मालिगु धाःगु दु ।
Categorized in अन्तर्राष्ट्रिय
