कोरोना भाईरसं बांमलाक्क प्रभावित देय् मध्येया छगू इण्डोनेसियां गरीब देय्तय्त नं समान रुपं खोप इनेत तःमि देय्तय्त आह्वान याःगु दु ।

कोरोना विरुद्धया लडाई याकःचां त्याकेमफइगु धासें इण्डोनेसियाया राष्ट्रपति जोको विदोदों वीवीसीलिसेया अन्तर्वार्ताय् सीमित देय्तय्त जक गाक्क खोप दइगु व चीमि देय्तय्सं म्ह्वः ल्याखय् लुधनेमाःगु अवस्थाया मदयेकेमाःगु धयादिल ।

विश्व जलवायु सम्मेलनय् ब्वति कायेत बेलायत वने न्ह्यः बियादीगु अन्तर्वार्ताय् राष्ट्रपति विदोदों थ्व संकटया इलय् तःमि देय्तय्सं चीमि देय्तय्त उदार रुपं ग्वहालि यानाः विश्व संकट समाधानय् ग्वहालिमि जुइमाःगुलिइ बः बियादिल ।

अन्तर्वार्ताया झ्वलय् राष्ट्रपति विदोदों थःपिनि अस्पतालत आः नं विरामीं खचाखच जायाच्वंगु व थःपिन्सं फक्व कुतः यानाच्वनागु धासें खोप विना थ्व संक्रमण पार याये मफइगु पुष्टि जूगु धयादिल ।

इण्डोनेसियाय् आः नं न्हिं ५०द्वः कोरोना संक्रमित अप्वयाच्वंगु दुसा १ लखत्या स्वयां अप्वःया ज्यान वनेधुंकल ।

Categorized in अन्तर्राष्ट्रिय