इतिल्हने सम्यक झःझः धायेक क्वचाल
सुरज, लहनान्युज | चिल्लाथ्व चतुर्थी ११४० (फेब्रुअरी २७ २०२०)
न्यादँय् छक्वः जुइगु इतिल्हने सम्यक महादान पर्व क्वचाःगु दु । ‘दिपंकर पर्व’ नामं नं प्रचलित थुगु परम्पराय् शाक्य भिक्षु, बज्राचार्यनाप यल, येँ, ख्वप, किपू, चोभाः लगायत थीथी थासं दिपंकर बुद्ध, अवलोकितेश्वर, बसुन्धरादेवी, आर्यतारा द्यःपिं पुज्यानाः दान बियाः हंगु खः । इतिल्हने सम्यक महादान पर्वय् १४९ द्यःपिं दुथ्याःगु ग्वसाः खलकं धाःगु दु ।
सम्यक दान धइगु शुद्ध मनं निःस्वार्थ दान यायेगु व सम्यक सम्बोधिया लँपु खः । थ्व पर्वया सार धइगु दानपारमिताया अभ्यास खः ।
निन्हुयंक जूगु सम्यकय् महादान पर्वय् बुधबाः वाद्यवादक खलःपुचः मुनेगुनापं यल, येँ, किपू व मेमेगु थासं द्यःपिं यल लाय्कूली मुंकेगु, हिरण्यवर्ण महाविहार, क्वाबहाः आःजुया आगमन, ज्येष्ठवर्ण महाविहारया वसुन्धरादेवी कयाःहयाःलि सकल द्यःपिन्त झ्वःलाक्क बिज्याकाः नागबहालय् लसकुस यायेगु ज्या जूगु खः । मध्य चान्हय् सकल द्यःपालाःपिन्सं पूजा न्ह्याकेधुंकाः सकल द्यःपिन्त चासी देछायेगु ज्या जूगु खः ।
विहिबाः सुथसिया ३ बजेति हिरण्यवर्ण महाविहारया शाक्यमुनि बुद्ध न्ह्यःने महाद्वीप प्रज्वलन जुल । न्हिनसिया १२ बजेति हिरण्यवर्ण महाविहारया दशपारमिता व स्थविर आःजुपिन्त लिखा चायेकेगु व थुगु हे विहार आःजुया प्रतिनिधिपिन्सं यम्पि महाविहारया आःजुपिन्त लिखा चायेकेगु ज्या जूगु खः । अनंलिपा भूमिशोधन यानाः दशपारमिता आःजुपिंपाखें महादान परिसर परिक्रमा यायेगु ज्या क्वचायेवं ईतिल्हने सम्यक महादान बीगु ज्या न्ह्याःगु खः । सनिलया ६ बजेति वसुन्धरादेवी, दिपंकर बुद्ध, आर्यतारा, लगायत सकलें द्यःपिं थःथःगु विहारय् लितयंकाःलि थुगु सम्यक महादान पर्वया विहिवाःया ज्या क्वचाःगु खःसा औपचारिक रुपं इतिल्हने सम्यक महादान पर्व धाःसा यःसिं क्वःथले धुंकाः क्वचाइगु ग्वसाः खलकं धाःगु दु ।
दान बीत मरि छुइत भुतू दयेकेगु, मरि छुइगु, बासुकी नागराज व चम्पक नागराजया ज्यून्यास पूजा, यःसिं थनेगु, हिरण्यवर्ण महाविहारया २० स्थविर आःजुपिंनाप विहार सुधार समितिया पदाधिकारीपिं मुनाः ब्वति कायेमाःगु दक्वं बिहारय् निमन्त्रणा बीगु ज्या जूगु खः ।
इतिल्हने सम्यक महादान पर्वया पौराणिक धापू
ठकुरी वंशया जुजु भाष्करदेवया सन्तति भरिभारों थःगु दरिद्रता त्वपुइत सौपा मुंकाः धुकुती तयाःगु जुयाच्वन । धुकूया ताःचाः सदां थःम्ह घानातइगु व थ्व विषय थःगु जहानयात तकं सुचं मब्यूगु जुयाच्वन । छन्हु बागमती स्नातया नितिं भरिभारो वंबलय् ताःचा त्वःफ्यूगु जुयाच्वन । व हे इलय् जहानं धुकुती सुचुकातःगु छु जुइ धकाः स्वःबलय् लुँया भण्डार खन । थुकिया बारे भरिभारोयात न्यंबलय् भरिभारो नं अजू चाल । धुकुती स्वःबलय् धात्थें लुँ खंबलय् “थ्व दक्वं त्रिरत्नया सुवाःया कारण” जूगु धकाः थः जहानयात कन । थुगु हे धनं सम्यक महादान पर्व शुरु यानाःलि निरन्तरताया लागि गुथि स्थापना यानाः हिरण्यवर्ण महाविहारयात भाला ब्यूगु धापू न्यनेदु ।
थ्व हे विश्वासया आधारय् गोल्डेन टेम्पलया नामं प्रसिद्ध हिरण्यवर्ण महाविहारया तत्वावधानय् २० स्थवीर आःजुपिन्सं थुगु पर्व ग्वसाः ग्वयावयाच्वंगु खः ।
