इथियोपियाया तिग्रे क्षेत्रय् सरकारं छखेरया युद्धविराम यात
बछलागा पञ्चमी ११४१, असार १५ मंगलबाः
इथियोपियाया सरकारं विद्रोहीतये पकड दूगु क्षेत्र तिग्रेय् युद्धविरामया घोषणा याःगु दु ।
प्रधानमन्त्री अबी अहमदं वार्तापाखें हे समस्याया समाधान यायेत तयार दूगु धासें युद्धविरामया घोषणा याःगु बीबीसीं न्ह्यथंगु दु । ताः ई निसें विद्रोही तिग्रे पुचःया सशस्त्र ल्वापुया हुनिं द्वलंद्वःम्ह विस्थापित जूगु दु ।
संयुक्त राष्ट्रसंघं सरकार व विद्रोहीया ल्वापुया हुनिं उगु क्षेत्रय् ५०गू लख सिवें आपा सर्वसाधारणयात मानवीय ग्वहालि मजिमगाः जूगु न्ह्यथंगु दु । लिपांगु छुं वालय् विद्रोहीं थःगु सशस्त्र ज्यापहःयात तच्वयेकेधुंका सरकारं छखेर कथं युद्धविरामया घोषणा याःगु बुखँय् न्ह्यथनातःगु दु ।
टाइगर पीपुल्स लिबरेसन फन्ट (टीपीएलएफ) या प्रवक्ता गेटाच्यू रेडां विद्रोहीया दबाबया हुनिं सरकारं छखेरया युद्धविराम याःगु धयादीगु दु । वयकलं थःपिनि मागप्रति सरकार सकारात्मक जूसां वार्ता प्रक्रिया न्ह्याइगु नं धयादीगु दु । थुखे संयुक्त राष्ट्रसंघया महासचिव एन्टोनियो गुटेरसं मानवीय सहायता आवश्यक जूगु थासय् थथें ग्वहालि यायेगु प्रतिवद्धता न्ह्यथनादीगु दु ।
वयेकलं राजनीतिक कथं हे समस्याया ज्यंका माला इथियोपियाया ल्वापु ज्यंकेगु कुतः यायेगु धयादीगु खः ।
