इराकपाखें नं अमेरिकी सैनिक लिहाँवनिगु
दिल्लागा चतुर्थी ११४१,साउन १२ मंगलवाः
अमेरिकां थुगुसिया अन्त्यतकय् इराकं थः सेना लित सतीगु जूगु दु ।
राष्ट्रपति जो बाइडेनं ह्वाइट हाउसय् इराकी प्रधानमन्त्री मुस्तफा अल–कधिमी नापलायेधुंकाः थन्यागु घोषणा यानादीगु खः । तर अमेरिकी सेनां इराकी फौजयात तालिम व मेमेगु ग्वहालि यानाच्वनेगु धागु दु । इराकय् आः निद्व व न्यासःम्ह अमेरिकी सेना दु ।
थुखय् इराकया प्रधानमन्त्री कधिमीं थःगु देशय् आः विदेशी सेना म्वाःगु प्रतिक्रिया बियादीगु दु । वय्कलं पुननिर्माण, शिक्षा व रोजगारीया नितिं इराकं ह्यूपाः यायेमाःगु ई वःगु धासें थुकिइ विदेशी सेना म्वाःगु धयादीगु खः ।
इराकय् हिंसात्मक ज्यापहःलय् दुथ्याःगु इस्लामिक स्टेट पुचःविरुद्धया कारवाहीलय् अमेरिकी सेनां इराकयात ग्वहालि यानावःगु खः । वंगु दँ राजधानी बगदादय् ड्रोन हताः जूबलय् इरानया हाइ कमाण्ड जनरल कसेम सोलेमानी व इरान समर्थित शिया मुस्लिम मिलिसियाया नेता सीवं इराकय् अमेरिकी सेनाया विषयलय् बहस न्ह्याःगु खः ।
आः वयाः थ्व विषय मू मुद्दा थें जूगु दु । इरानलिसे सम्बन्धित राजनीतिक दलं सुन्नी जिहादी पु्चलं अमेरिकी सेना लित सःतेत चर्को दबाब बिइगु यानावःगु खः ।
थ्वहेदथुइ शिया मिलिसियायात अमेरिकां सलंसः रकेट, मोर्टार व ड्रोन हताः याःगु द्वपं दु ।
Categorized in अन्तर्राष्ट्रिय
