इरानय् कट्टरपन्थी धर्मगुरु इब्राहिम रायसी निर्वाचित
बछलाथ्व दशमी ११४१, असार ६ गते आइतबाः
इरानया राष्ट्रपतिइ कट्टरपन्थी धर्मगुरु इब्राहिम रायसी निर्वाचित जुयादीगु दु ।
३म्ह प्रतिष्पर्धीयात बुका रायसी इरानया १३म्हम्ह राष्ट्रपतिइ निर्वाचित जुयादीगु बीबीसीं न्ह्यथंगु दु । वयेकलं ६२ गू प्रतिशत मत चूलाकादीगु दु । न्हूम्ह निर्वाचित राष्ट्रपति रायसीं वइगु अगस्टय् सपथ कया कार्यभार कःघानादीगु धाःगु दु ।
थ्वहे दथुइ इजरायलं इरानया राष्ट्रपतिइ इब्राहिम रायसी निर्वाचित जूगु नापं अन्तर्राष्ट्रिय समुदायं चिउता प्वंकेमःगु न्ह्यथंगु दु । रायसी राष्ट्रपति निर्वाचित जूगु नापं इरानं आणविक ज्यापहः अप्वयेकेफइगु धका अन्तर्राष्ट्रिय समुदायं चिउता प्वंकेमाःगु इजरायलं टिप्पणी याःगु खः ।
इजरायलया विदेश मन्त्रालयया प्रवक्ता लियर हैतं न्हूम्ह निर्वाचित राष्ट्रपति रायसीं थ्वयान्ह्यः हे आणविक ज्यापहः अप्वयेकेगु छुमां बिउगु धासें थुकिया परीणाम सुखद मजुइगु धका चिउता प्वंकादीगु दु । उखे निर्वाचनया लिच्वः वःगु नापं न्हूम्ह निर्वाचित राष्ट्रपति रायसी थःपिन्सं इरानया नागरिकया मनंतुना कथं हे ज्या यायेगु प्रतिवद्धता न्ह्यथनादीगु दु ।
तर विश्लेषकतयेसं धाःसा इरानं हाकनं आणविक ज्यापहःयात प्राथमिकता नापं न्ह्याकेगु छुमां रायसीं बिउगु धका चिउता प्वंकुगु दु । इरान व इजरायल दथुइ ताः ई निसेंया ल्वापु हाकनं ब्वलने फइगु धासें गुलिखय्सिं चिउता तकं प्वंकुगु दु । इजरायलं अन्तर्राष्ट्रिय समूदायं इरानयात आणविक ज्यापहः संचालन मयायेत दबाब बिइमाःगु तक न्ह्यथंगु दु ।
थगुने इरानं इजरायलयात शीर्ष परमाणु वैज्ञानिकया हत्या व अप्रिलय् युरेनियम सम्वद्र्धन प्लान्टय् हताः याःगु धका द्वपं बिउगु खः । अथेहे अमेरिकी पूर्व राष्ट्रपति डोनाल्ड ट्रम्पं नं थःगु कार्यकालय् परमाणु सम्झौता भंग याना यकति कथं इरानय् थप प्रतिबन्धया घोषणा यानादीगु खः ।