उत्कृष्ट उद्योगयात राष्ट्रिय उत्पादकत्व सिरपाःया घोषणा
लहनान्युज | दिल्ला थ्व त्रयोदशी ११३७ (जुलाई ७ २०१७) ।
यल उद्योग वाणिज्य संघं वइगु आर्थिक वर्षया शुरुवातनिसें देय्न्यंकया घरेलु, साना, मध्यमनापं तःधंगु उद्योगत मध्ये उत्कृष्ट उद्योगयात ‘राष्ट्रिय उत्पादकत्व सिरपाः’ लःल्हाय्गु घोषणा याःगु दु ।
संघया सभाकक्षय् छगू पत्रकार सम्मेलन यासें संघया नायः सविन श्रेष्ठं उकथंया जानकारी बियादीगु खः । वय्कलं उगु सिरपाः श्रावण वा भाद्र दुने बीगु नं घोषणा यानादीगु खः ।
थुगु सिरपाःपाखें देशयात आर्थिक समृद्धिया लँपु यंकेत सकारात्मक वातावरण दय्कीगु विश्वास प्वंकादिसें आर्थिक समृद्धिया मंकाः लक्ष कार्यान्वयनया दिशाय् देश न्ह्याःवंगुलिइ राष्ट्रिय उत्पादनया बृद्धिया नापनापं व्यवसायया अधिकतम विकासय् उत्प्रेरित याय्त ग्वाहालि जुइगुलिं थुकथंया सिरपाःया परिकल्पना यानागु नं धयादीगु दु ।
थ्वहे झ्वलय् सिरपाःया नितिं आयात व्यवस्थापनया भूमिका, लजगाः, राजश्व योगदानलिसें थीथी झिंप्यंगू आधारय् छनोट याय्गु व थुकिया नितिं नेपाल सरकार उद्योग मन्त्रालय, राष्ट्रिय उत्पादकत्व तथा आर्थिक विकास केन्द्र, नेपाल उद्योग वाणिज्य महासंघ, नेपाल आर्थिक पत्रकार समाज व यल उद्योग वाणिज्य संघया प्रतिनिधित दुथ्याःगु छगू उच्च स्तरीय निर्णायक मण्डल नं नीस्वंगु जानकारी श्रेष्ठं बियादिल ।
ज्याझ्वलय् संघया निवर्तमान नायः अजरमान जोशी लिसेंया कार्यसमितिया पदाधिकारीपिनिगु उपस्थिति दुगु खः ।
लहनान्युज
