२०८० चैत्र १५, बिहिबार

उपत्यका नगरपालिका फोरमया विस्तारित वैठक किपुलिइ

लहनान्युज | सिल्लाथ्व तृतिया ११४० (जनवरी २७ २०२०)

स्वनिगःया नगरपालिकात दुथ्याःगु ‘उपत्यका नगरपालिका फोरम’या विस्तारित मुँज्या किपुलिइ च्वन । उगु मुँज्याय् स्वनिगःया छुंछुं नगरपालिका बाहेक दक्वं हे नगरपालिकाया ब्वति दुगु खःसा पाहाँकथं धुनिबेशी नगरपालिका व ककनी गाउँपालिकाया ब्वति दुगु खः ।
 
 
फोरमया नायःलिसें येँ महानगरपालिकाया प्रमुख विद्यासुन्दर शाक्यया अध्यक्षताय् न्ह्याःगु उगु मुँज्या फोरमया छ्याञ्जे मध्यपुर थिमि नगरपालिकाया प्रमुख ई. मदनसुन्दर श्रेष्ठं न्ह्याकादीगु खः । मुँज्याय् थ्व हे वइगु अक्टोबरय् ‘विश्व मेयर सम्मेलन’ याय्गु प्रस्तावयात कयाः सहलह जूगु खः । उगु सम्मेलनया तयारीया नितिं छगू ज्यापौतकं न्ह्यब्वःगु खः ।
 
फुक्क हे नगरपालिकाया समस्या जुयाच्वंगु फोहर व्यवस्थापनयात कयाः नं दुग्यंक सहलह जूगु खः । स्वनिगःया फोहर वाय्गु थाय् जुयाच्वंगु सिसडोल व बन्चरे डाँडा ल्याण्डफिल्ड साइट लागाया जनप्रतिनिधिपिं धुनिवेशी नगरपालिकाया प्रमुख बालकृष्ण आचार्य, उपमेयर निरु खरेल अथे हे ककनी गाउँपालिकाया नायः मान बहादुर लामा व ककनी गाउँपालिका १ नं. वडाया अध्यक्ष चन्द्र बहादुर श्रेष्ठं फोहर वाय्थाय्या समस्यायात कयाः जानकारी बियादीगु खःसा अन बैज्ञानिकरुपं फोहरयात व्यवस्थित याय्त इनाप यानादीगु खः 
 
मुँज्या लिपा जूगु पत्रकार सम्मेलनय् मुँज्याया जानकारी बियादिसें विश्व मेयर सम्मेलनया नितिं दय्कूगु लोगो परिमार्जनलिसें पारित जूगु, विश्व मेयर सम्मेलनया अवधारणा व प्राविधिक ज्याझ्वःत परिमार्जनलिसें पारित जूगु अथे हे सम्मेलनया नितिं माःगु प्रस्तावित बजेटय् येँ महानगरपालिका व यल महानगरपालिका जानाः बच्छि व ल्यंदनीगु नगरपालिकां बच्छि बजेट तय्गु क्वःज्यूगु जानकारी बियादिल ।
 
पत्रकारतय्सं न्यंगु न्ह्यसःया लिसः बियादिसें फोरमया नायःलिसें येँ महानगरपालिकाया मेयर शाक्यं काठमाडौं उपत्यका प्राधिकरण खारेजीया माग मत्वःतानिगु व उपयुक्त विकल्पया लँ मालाच्वनागु धयादिसें थ्व माग पूवंकेगुु ज्याय् न्ह्यज्यानाच्वनागु धयादिल ।
 
Categorized in राजनीति