२०८० चैत्र १६, शुक्रबार

उपाधि दाबेदार मनाङ व संकटालिसे जुल ज्वलिंज्व

थिंला पारु ११४२, मंसीर १९ आईतवाः

इन्ज्युरी इलय् फ्रान्कलिन कोटेटालां उत्कृष्ट गोल यायेधुंका उपाधि दावेदार मनाङ मस्याङ्दी क्लब कासा बुइगु पाखें ल्यंगु दु ।

कासाय् निक्वःतक्क लिउने लाःगु मनाङं संकटा क्लबलिसे २गू–२गू गोलया ज्वलिन्ज्वः म्हितूगु दु । त्रिपुरेश्वरस्थित दशरथ रंगशालाय् शनिबाः जूगु कासाय् संकटा विरुद्ध अग्रता कायेगु झ्वलय् संकटाया निरज बस्नेत व उत्तम राईं गोल याःगु दु ।

मनाङया दयानन्द सिंह व फ्रान्कलिन कोटेटालां गोल याःगु खः । कासाया ३१गूगु मिनेटय् निरज बस्नेतं गोल याना संकटायात अग्रता बिउगु खः । ३५गूगु मिनेटय् मनाङया दयानन्द सिंहंं ज्वलिन्ज्वः गोल याःगु खः  । ७०गूगु मिनेटय् उत्तम राईं गोल याना संकटायात २गू–१गूया अग्रता बिउगु खः ।

तर, इन्ज्युरी ईया थप जूगु ४गूगु मिनेटय् मनाङया फ्रान्कलिन कोटेटालां पेनाल्टी बक्स पिनं उत्कृष्ट गोल याना मनाङयात बुइगुपाखें ल्यंकुगु खः । न्ह्यानाच्वंगु लिगय् मनाङया थ्व न्हापांगु ज्वलिन्ज्वः खः । थ्व लिसें मनाङं शीर्ष थाय्या सातदोबाटो युथ क्लबलिसे ल्याः ज्वलिन्ज्वः याःगु दु । ३ गू कासां ७ गू ल्याः मुंकुगु मनाङ निगूगु थासय् यथावत दु । संकटा धाःसा ५ गू ल्याः मुंका ३गूगु थासय् थाहाँवंगु दु ।

निगूगु कासाय् च्यासल युथ क्लब व न्युरोड टिम एनआरटीं ज्वलिन्ज्वः कासा म्हिता ल्याः इनाकाःगु दु । त्रिपुरेश्वरस्थित दशरथ रंगशालाय् जूगु कासाय् च्यासल व एनआरटीं  १गू–१गू गोलया ज्वलिन्ज्वः कासा म्हितुगु खः । प्रतिस्पर्धात्मक जूगु कासाय् च्यासलया नितिं रुमेश बर्तौलां गोल याःगु खः ।

एनआरटीया दिपेश घलें ज्वलिन्ज्वः गोल याःगु खः । थ्व ज्वलिन्ज्वः लिसें च्यासलं ३ गू कासाय् ४ गू ल्याः मुंकुगु दु । एनआरटीं ३ गू कासाय् २गू ल्याः मुंकुगु दु  ।

Categorized in कासा