उपाधि नितिं इटाली व इंग्ल्याण्ड दथुई धेँधेँबल्ला
दिल्लाथ्व पारु ११४१,असार २७ आईतवाः
युरोकप फुटबलया उपाधिया नितिं थौं इटाली व इंग्ल्याण्डदथुइ धेंधेंबल्ला जुइ ।
बेलायतया राजधानी लण्डनस्थित ऐतिहासिक वेम्बले रंगशालाय् नेपाली ई कथं थौं चान्हय् जःछिपाः छताः ईलय् कासा जुइ । थ्वहे रंगशालाय् इंग्ल्याण्डं सन् १९६६ या विश्वकप फुटबल त्याकूगु खः ।
अनलिं यक्व हे कासात जूसां आःतक फाईनलय् मथ्यंनि । तर थौं चान्हय्या कासाय् इंग्ल्याण्डं उपाधिया नितिं धेंधेंबल्ला यायेगु तयारी यानाच्वंगु दु । तर इटालीविरुद्धया कासा उलि अःपू धाःसा मजू ।
प्यक्वतक विश्वकप त्याकेधुंकूगु इटालीं युरोकप छक्व जक त्याकूगु दु । सन् २००० व २०१२ या फाईनलय् छसिकथं फ्रान्स व स्पेनलिसे बूगु इटाली आःया धाःसा उपाधि त्याकेगु लक्ष्यनाप मैदानय् कुहाँवयेगु धाःगु दु ।
इटालीं क्वाटरफाईनलय् बेल्जियमयात बुकूगु खःसा सेमिफाईनलय् स्पेनयात बुकूगु खः । उखय् इंग्ल्याण्डं क्वाटरफाईनलय् युक्रेनयात बुकुगु खःसा सेमिफाईनलय् डेनमार्कयात बुकूगु खः ।
Categorized in कासा
