एएफसि सोलिडारिटि कप - 'नेपाल भर्सेज टिमोर लिस्ट प्रिभ्यू'
– प्रजित शाक्य
उपाधि त्याकेगु आज्जुलिसें एएफसी सोलिडारिटी कपय् नेपालं शनिबाः टिमोर लिस्टविरुद्ध म्हिताः थःगु यात्रा न्ह्याकेत्यंगु दु । न्हापांगु कासा त्याकेवं हे नेपालया सेमिफाइनल यात्रा निश्चित जुइ । न्हापांगु कासाय् टिमोरया कमजोर ब्वज्या व न्हापाया इतिहास स्वयेबलय् टिमोर विरुद्धया कासाय् नेपाल हे त्याइगु खनेदु ।
टिमोर न्हापांगु कासाय् बु्रनाईलिसे ४/० बूगु खः । पाकिस्तान व बङ्गलादेशं मम्हितेगु धायेधुंकाः पुचः ए दुने स्वंगू जक टिम दु । ब्रुनाईनं तःधंगु अन्तरय् कासा त्याकेधुंकाः लिपांगु प्यंगुलिइ थःगु थाय् लगभग पक्का यायेधुंकूगु दु ।
थुगु निगू टिम दथुइ आःतक्क निगू कासा जुइधुंकूगु दु । विश्वकप ल्यज्या २०१४या न्हापांगु चरणय् नेपालं न्हापांगु लेग २/१ व निगूगु लेग ५/० गोल अन्तरं त्याकूगु खः ।
व हे लिसें, नेपाल अन्तर्राष्ट्रिय उपाधि ह्याट्रिकया लँपुइ दु । बङ्गलादेशय् जूगु बङ्गबन्धु गोल्डकप व साग फुटबल त्याकूगु नेपालं थुगु उपाधि नं त्याकूसा अन्तर्राष्ट्रिय उपाधिया ह्याट्रिक याइ ।
थ्व बाहेक, नेपालया जापानी प्रशिक्षक ग्योटोकु कोजी धाःसा थःगु न्हापांगु कासाय् जीत ल्हातय् लाकाः विजयी सुरुवात यायेगु ताकय् दु । वयकःया प्रशिक्षणय् नेपालं लाओसविरुद्ध छगू मैत्रीपूर्ण कासा जक म्हितूगु दु, गुगु १/१ गोलया ज्वलिंज्वलय् क्वचाःगु खः ।
न्हापांगु कासायात कयाः मिश्रित अनुभव कयादीम्ह प्रशिक्षक कोजीं बु्रनाईलिसे लज्जास्पदक तरिकां बूगु टिम खःसा टिमोरयात हल्का रुपं कायेगु पक्षय् मदु । बु्रनाई विरुद्धया हारं टिमोरयात कमजोर भाःपीमज्यू । उगु कासा लखं जाःगु मैदानय् जूगु हुनिं टिमोरं स्वाभाविक कासा म्हिते मफुत । उकिं लखं टिमोर व ब्रुनाईया धात्थेंया कासा झीसं स्वयेमखंनि । उकिं उगु लिच्वलं जिमिगु लागिं छुं महत्व तइमखु, जिपिं थःगु कासाय् केन्द्रित जुइ – प्रशिक्षक कोजीया धापू दु ।
प्रशिक्षक कोजी त्याकेगु बानी दयेकेत पुचः झ्वःया निगुलिं कासा त्याकेत हे म्हितेगु धयादी । जिपिं निगुलिं कासा त्याकाः त्याकेगु बानी दयेके – वयकलं धयादी । कुचिङय् छवाः न्ह्यः हे थ्यंगुलिं नं कोजी लयताः । जिमिसं थःगु ई फरक अवस्थाय् अभ्यास यानाः सदुपयोग यानगु दु, प्रावृmतिक मैदान, लखं जाःगु मैदान व क्रृतिम जलय् जिमिसं गाक्क प्रशिक्षण याना, अथेजुयाः जिपिं गुगु नं परिस्थितिइ अभ्यस्त जुइफु – प्रशिक्षक कोजीं जानकारी बियादिल ।
कोजीया कथं टिमोरविरुद्धया रणनीति पिच व मौसमय् बः काइ । वयकलं धयादी – प्राविधिक कासाय् विपक्षी स्वयां जिपिं उत्कृष्ट खः तर छेँय् वृmतिम मैदानय् जक अभ्यास जूगुलिं कसामितयसं प्रावृmतिक मैदानय् गुकथं म्हिती धइगु खुल्दुली दु ।
टिमोर लिस्टया प्रशिक्षक फाबियो डा सिल्भां शनिबार नेपालविरुद्ध म्हितेबलय् वा मवयेमा धकाः कामना यानाच्वनादीगु दु । लखं जाःगु मैदानय् कासामित कमजोर जूगु व लिपांगु कासाय् वां यानाः तापाक्कया पास म्हितेत बाध्य जल, गुगु टिमोरया म्हितेगु शैली ख हे मखु – फाबियों धयादी ।
न्हापांगु कासाय् बांमलाक्क बूगुलिं टिमोरयात आः त्याकेगुया विकल्प हे मदु धाःसां ज्यू । उकिं नेपाल विरुद्धया कासा न्ह्याक्व हे थाकुसां कासाय् थःगु सम्भावना ल्यंका हे तयेत शतप्रतिशत कुतः यानाः म्हितेगु प्रतिक्रिया प्रशिक्षक सिल्भां बियादीगु दु ।
नेपाल विरुद्धया कासाय् स्ट्राइकर रुफिनो गामाया टिमोर लिस्टयात लुकंका बी फु । बु्रनाई विरुद्धया कासाय् गामां ह्याउँगु कार्ड नयेमाःगु खः । अथेसां प्रशिक्षक सिल्भां वयागु अनुपस्थितिं टिमयात मपाइगु धयादी ।
ल्यायम्ह कासामित आपाः दुगु टिमोरया टिम दच्छि न्ह्यः फिफा वरीयताय् १४६गूगु थासय दुगु खः । तर सन् २०१६य् टिमोरं म्हितूगु झिगुलिं कासा बुइमाःगु खः । अथेजुयाः नं नेपाली टिमं स्वयाः यक्व हे अन्तर्राष्ट्रिय अनुभव दुसां टिमोर लिस्ट बल्लाःगु टिम खनेमदु । आः टिमोर लिस्ट १८६गूगु थासय लायेधुंकल । संयोग धायेमाली, नेपाल नं व हे थासय् दु ।
नेपाली टिम सन्तुलित खनेदु । लिपांगु निगू कासा त्याकूबलय् गोलमेशिन जूम्ह नवयुग श्रेष्ठ व विमलघर्ती मगरया रुपय् नेपालयाके निम्ह उत्कृष्ट स्ट्राइकर दु । अनिल गुरुङ, विराज महर्जन, रोविन श्रेष्ठ व किरण चेम्जोङया अनुभवं नं नेपालयात लबः हे बी ।
कप्तान अनिलं नं टिमोर लिस्टयात कमजोर भाःप्यूगु मदु । न्हापांगु कासा बुइधुंकाः इमिसं प्राविधिक व शारिरीक रुपं यक्व हे प्रगति यायेधुंकूगु स्पष्ट खनेदु – वयकलं धयादी ।
अथे हे फिजियो सुरज भुषालं टिमय् खास हे घाः वा चोटया समस्या मदुगु जानकारी बियादीगु दु । डिफेन्डर रञ्जित धिमाल व स्ट्राइकर रञ्जित विष्ट धाःसा शतप्रतिशत मदु, अभ्यास कासाय् रञ्जित घाःपाः जूगु खः । वयकलं म्हितेगु बारे कन्हय् जक क्वःछिनादी – फिजियो भुषालं कनादिल । भुषालया कथं रञ्जन धाःसा विरामी जूगु दु । मिडफिल्डर विशाल राईयात नं चीधंगु चोट लाःगु दु तर वयकः लगातार अभ्यासय् दु व टिमयात मालीगु स्थितिइ म्हितेफु ।
नाडीया चोटया शल्यक्रिया ताःलायेधुंकाः टिमय् लिहांझाःम्ह स्ट्राइकर भरत खवास नं बांलाःगु स्थितिइ दु । नेपाली टिमय् विमल, विशाल श्रेष्ठ, सुमन लामा, रञ्जित व रञ्जनं पुनरागमन याःगु खःसा दीपक गुरुङ न्हूगु ख्वाःपाः खः ।
