एएफसी सोलिडारिटी कपया नितिं कासामि ल्यल
लहनान्यूज सम्वाददाता | ने.सं. ११३६ कौलागा दशमि (२६ अक्टोबर २०१६)
![](https://www.lahananews.com/sites/default/files/kipa-madu_5.jpg)
अखिल नेपाल फुटबल संघ एन्फां वइगु कात्तिक १७ गतेनिसें मलेसियाय् शुरु जुइगु एएफसी सोलिडारिटी कप फुटबलया नितिं नेपाःया राष्ट्रिय पुचःया घोषणा याःगु दु ।
एन्फां निगू चरणय् उगु कासाय् ब्वति काइपिनिगु अन्तिम नां घोषणा याःगु खः । न्हापांगु चरणय् स्वीम्ह कासामि प्रशिक्षणया नितिं सःतूगु खःसा प्रकाश बुढाथोकि व विकास तामाङ्ग घाःपाः जूगु हुनिं प्रशिक्षण् ब्वति कायेमफूगु खः ।
प्रशिक्षणय् दुथ्याःपिं २८ म्ह कासामिपाखें २३म्ह कासामि उगु पुचःया नितिं ल्याःगु खः ।उगु पुचलय् भेट्रान स्ट्राइकर अनिल गुरुङ्गयात कप्तान कथं ल्यःगु दु । पुचलय् किरणकुमार लिम्बु, विकास कुथु व विशाल श्रेष्ठयात गोलरक्षकया कथं ल्यःगु दुसा डिफेण्डरय् विराज महर्जन, रविन श्रेष्ठ, अनन्त तामाङ्ग, दीपक गुरुङ्ग, आदित्य चौधरी, कमल श्रेष्ठ, देवेन्द्र तामाङ्ग व रञ्जित धिमाल ल्यःगु दु ।
अथेहे विक्रम लामा, विशाल राई, सुजल श्रेष्ठ, हेमन गुरुङ्ग, अञ्जन विष्ट व राजेन्द्र रावल मिडफिल्डरकथं ल्यःगु दुसा स्ट्राइकरत अनिल गुरुङ्ग, भरत खवास, विमल घर्तीमगर, नवयुग श्रेष्ठ, सुमन लामा व रञ्जन विष्ट उगु पुचलय् दुथ्याःगु दु । उगु पुचलय् दुथ्याःपिं मध्ये दीपक गुरुङ्ग व देवेन्द्र तामाङ्ग न्हापांखुसी अन्तर्राष्ट्रिय कासा म्हितेत्यंगु खः ।
कासाया ए पुचलय् लाःगु नेपालं न्हापांगु कासा कार्तिक २० गते पूर्वी टिमोर व निगूगु कासा कार्तिक २३ गते ब्रुनाइलिसे धेंधेंबल्ला याइ ।