एट्लेटिको मड्रिडं बार्सिलोनायात २–० गोलं बुकल
ञंलागा द्धादशी ११४१, असोज १७ आईतवाः
स्पेनिस लिग फुटबल ला लिगाय् एट्लेटिको मड्रिडं बार्सिलोनायात २–० गोलं बुकाब्यूगु दु ।
वंगु चान्हय् थःगु हे ख्यलय् जूगु कासाय् एट्लेटिकोयात त्याकाबीत थोमस लेमार व लुइस सुवारेजं १, १ गोल यात । कासा त्याःगुलिसें एट्लेटिकों ८ कासां १७ ल्याः मुंकाः ल्याः धलःया निगूगु थासय् थहांंवंगु दु ।
शिर्ष थाय्या रियाल मड्रिडया नं ७ कासां १७ ल्याः हे दु । बार्सिलोना १२ ल्याः मुंकाः झिगूगु थासय् दु । न्ह्यानाच्वंगु सिजनया लिगय् बार्सिलोनां कमजोर कासा क्यनाच्वंगु दु ।
लियोनल मेस्सीं क्लब त्वःतेधुंकाः बार्सिलोनाया कासा नं बांमलानावंगु दु । थुकिं टोलीया डच प्रशिक्षक रोनाल्ड कोम्यानयात दबाब अप्वयावःगु दु ।
Categorized in कासा
