एन्फाया आकस्मिक मुँज्या च्वनिगु
दिल्लागा षष्ठी ११४१,साउन १५ शुक्रवाः
अखिल नेपाल फुटबल संघ (एन्फा) या केन्द्रिय ज्यासना पुचःया मुँज्या थौं च्वनेत्यंगु दु ।
राष्ट्रिय फुटबल टोलीया मू प्रशिक्षक अब्दुल्ला अलमुताइरीं राजीनामा बीगु घोषणा याःगुालिसें ब्वलंगु परिस्थितिया बारे सहलह यायेत एन्फां मुँज्या सःतूगु खः । मू प्रशिक्षक अलमुताइरीं एन्फायाि वरिष्ठ न्वकू पंकजविक्रम नेम्बाङं दवाव ब्यूगु द्वपं ब्युसें राजीनामाया घोषणा यानादीगु खः ।
मू प्रशिक्षकलिसे जूगु धाःगु विवाद व लिपांगु घटनाक्रमया छानबिनया माग यासें नेम्बाङं निवेदन दर्ता याकेधुंकाः एन्फां केन्द्रिय समितिया मुँज्या सःतूगु खः । अलमुताइरीं आइतबाः सामाजिक सञ्जालमार्फत नेम्बाङं लिपांगु स्ववाः न्ह्यःनिसे.समस्या ब्वलंकूगु न्ह्यथँसें थम्हं राजीनामा बीत्यनागु धयादीगु खः ।
तर, वय्कलं लिखित राजीनामा धाःसा मब्यूनिगु एन्फां धाःगु दु । एन्फा नायः कर्मा छिरिङ शेर्पां राजीनामा मबीत व छुं दिं आराम यायेत धायेधुंकाः वय्कलं लिखित राजीनामा मब्यूगु धाःगु दु ।
कतार फुटबल संघया ग्वाहालिं वंगु चैतय् अलमुताइरीं राष्ट्रिय टोलीया प्रशिक्षक पद कःघाःगु खः । वय्कःया नेतृत्वय् नेपालं इराकविरुद्ध मैत्रीपूर्ण कासा अले विश्वकप व एसिया कपया स्वंगू यानाः मुक्कं ४ कासा म्हितूगु दु ।
Categorized in कासा
