एन्फाया कचवं राखेपं छानविन याइगु
दिल्लागा दशमी ११४१,साउन १९ मंगलबाः
अखिल नेपाल फुटबल संघ एन्फाय् खनेदूगु लिपांगु कचवंया खँय् आः राष्ट्रिय खेलकुद परिषद् (राखेपं) छानविन याइगु जूगु दु ।
वरिष्ठ न्वकू पंकज नेम्वाङ व प्रशिक्षक अब्दुल्लाह अल्मुताईरी दथुया कचवंया खँय् आः परिषद्ं छानविन यायेत्यंगु खः । थ्वयान्ह्यः उगु कचवंया छानविन याना लिच्वःस थ्यंकाबिइत एन्फाया कार्यसमिति मुँज्यां युवा तथा खेलकुद मन्त्रालययात इनाप याःगु खः ।
मन्त्रालयं म्हिगः थुगु भाला राष्ट्रिय खेलकुद परिषद् (राखेप)यात हे लःल्हागु खः । न्हूगु सरकार गठन जुइधुंका युवा तथा खेलकुद मन्त्रालय मन्त्री विहिन दु । मन्त्रालयया कार्यकारी जिम्मेवारीइ दूम्ह सचिव केदार न्यौपानें फुटबल कचवं छानविनया नितं राखेपयात भाला बिउगु खः ।
राष्ट्रिय फुटबल टिमया मू प्रशिक्षक अलमुताइरीं वरिष्ठ न्वकू नेम्वाङ्गया हुनिं थःपिन्सं राजीनामा बिइगु घोषणा याःगु खः । थःपिन्त गम्भिर द्वपं लायेधुंका नेम्वाङ्गं छानविनया नितिं एन्फाय् निवेदन बिउगु खः ।
अनलिं प्रशिक्षकं तकं निम्ह पत्रकार लिसें वरिष्ठ न्वूकयात छानविनया नितिं निवेदन बिउगु खः ।
Categorized in कासा
