एन्फा न्वकू व फुटबल टोलीया प्रशिक्षक दथुइया विवाद प्रतिवेदन लःल्हायेगु तयारी
गुंलाथ्व दशमी ११४१, भाद्र १ मंगलवाः
अखिल नेपाल फुटबल संघ (एन्फा) या विवादया विषयस छानबीन यायेत नीस्वंगु समितिं बुधबाः प्रतिवेदन बीगु जूगु दु ।
एन्फाया वरिष्ठ न्वकू पंकजविक्रम नेम्बाङ व मिजं राष्ट्रिय फुटबल टोलीया प्रशिक्षक अब्दुल्लाह अलमुताइरी दथुइ विवादया छानविन यायेत राष्ट्रिय खेलकुद परिषदं समिति गठन याःगु खः ।
छानविनया झ्वलय् १४म्हेसिया बयान काःगु खः । व कथं माःगु भ्वं मुंकागु समितिं धाःगु दु । समितिं लिपांगु दिनय् वरिष्ठ न्वकू पंकजविक्रम नेम्बाङ, निम्ह संचारकःमि, कप्तान किरण चेम्जोङ, प्रशिक्षक अब्दुल्लाह अलमुताइरी व इक्वेस्ट्रीएन संघया नायः रवि राजकर्णिकारया बयान काःगु खः ।
बयान ब्यूम्ह प्रशिक्षक अब्दुल्लाह अलमुताइरीं थः छानविन प्रक्रियाय् सन्तुष्ट दुगु अभिव्यक्ति ब्यूगु खः । बयानया न्हापांगु दिं मंगलबाः समितिं एन्फा नायः कर्मा छिरिङ शेर्पा, प्रवक्ता किरण राई व राखेप अन्तर्गत फुटबलया मुख्य प्रशिक्षक अरुणा गुरुङया बयान काःगु खः । व धुंकाः बुधबाः न्वकू द्वय कृष्ण थापा व वीरबहादुर खड्का, फुटबल प्रशिक्षक बालगोपाल महर्जन, मू छ्यान्जे इन्द्रमान तुलाधर अले व्यवस्थापक उपाध्याय समितिइ बयानया लागिं उपस्थित जूगु खः ।
थुखे वरिष्ठ न्वकू नेम्बाङं छानविनया भाला मन्त्रालयं राखेपतक्क थ्यंगुलिं हे नं एन्फा नेतृत्वया असफलता दुगु धयादीगु दु । एन्फाया कार्यकारी समितिया आपतकालिन मुँज्यां विवाद समाधान याये मफयेधुंकाः छानबिनया लागिं एन्फां युवा तथा खेलकुद मन्त्रालययात इनाप याःगु खः ।
उकिया हे लिधंसाय् मन्त्रालयं राखेपयात छानबिनया लागिं पौ च्वःगु खः । वंगु वालय् राखेपं दुजः पुरेन्द्रविक्रम लाखेया कजिसुइ ७ दुजःया छानबिन समिति गठन याःगु खः । व हे समितिं मंगलबाःनिसें बयान कायेगु ज्या न्ह्याकूगु खः ।
Categorized in कासा
