एन्फा विवादया छानविन समितिं बयान काइगु
गुंलाथ्व द्धितीया ११४१, साउन २६ मंगलवाः
अखिल नेपाल फुटबल संघ एन्फाया आन्तरिक कचवंनय् छानविन यायेत राष्ट्रिय खेलकुद परिषद्ं दयेकुगु समितिं थःगु ज्या न्ह्याकुगु दु ।
समितिं थौं ४म्हसित बयानया नितिं सःतूगु दु । एन्फाया वरिष्ठ न्वकू पंकज विक्रम नेम्वाङ व मुख्य प्रशिक्षक अब्दुल्लाह अल्मुताइरी दथुया कचवं अप्वयेधुंका एन्फाया हे इनापय् युवा तथा खेलकुद मन्त्रालय जुसें खेलकुद परिषदं छानविनया भाला काःगु खः ।
बयानया नितिं १२म्हसित पौ छ्वगुलिइ न्हापांगु दिं थौं ४म्हसित सःतूगु श्रोतं न्ह्यथंगु दु । प्रशिक्षक अब्दुल्लाहं वरिष्ठ न्वकू नेम्वाङया हुनिं ज्या यायेत थाकुगु धासें राजिनामा बिइगु घोषणा यायेधुंका एन्फाया आन्तरिक कचवं छरपष्ट जूगु खः ।
थुगु विषयलय् छानविन यायेत राष्ट्रिय खेलकुद परिषद्या दुजः पुरेन्द्रविक्रम लाखेया कजिसुइ ७ म्ह दुजःया छानविन समिति गठन जूगु खः ।
समितिं थौं एन्फा नायः कर्माछिरिङ शेर्पा, पूर्व प्रवक्ता किरण राई, न्वकू कृष्ण थापा व राखेपया फुटबल चिफ कोच अरुणा गुरुङलिसे बयान कायेत्यंगु खः ।
Categorized in कासा
