एफ.ए कप फुटबलय् शिर्ष क्लबत लिभरपुल व टोटनह्याम हट्सपर त्याःगु दु ।

उपाधि दावेदार लिभरपुलं थःगु हे ख्यलय् जूगु कासाय् श्रिउस्बरी टाउनयात ४–१ गोलं बुकल । कासाय् श्रिउस्बरीया ड्यानियल उदों न्हापांगु गोल याःसां लिभरपुलया कैदै गोर्डनं ज्वलिंज्वः गोल यात ।

व धुंकाः फाबिन्हों २ व रोबर्टो फर्मिनों १ गोल यासें लिभरपुलयात त्याकाबिल । एफ.ए कपया हे मेगु कासाय् टोटनह्याम हट्सपरं मोरेक्याम्बेयात ३–१ गोलं बुकूबलय् वेष्टह्याम युनाइटेडं लिड्स युनाइटेडयात २–० गोलं ल्यूने लाकाबिल ।

वुल्भरह्याम्पटन वान्डरर्सं शेफिल्ड युनाइटेडयात ३–० गोलं बुकूबलय् आर्सनल धाःसा नटिङ्घम फरेष्टलिसे १–० गोलं बुइमाल । वंगु चान्हय् मेगु कासात त्याकाः स्टोक सिटी, लुटन टाउन, कार्डिफ सिटी व नरिच सिटी नं एफ.ए कप फुटबलया प्यंगूगु चरणय् थ्यंगु दु ।

Categorized in कासा