एमसीसी छलफल यायेत नेकपा सचिवालय बैठक
लहनान्युज | तछलागा नवमी ११४०,जेठ ३२ आइतवाः
एमसीसी परियोजनाबारे छलफल यायेगु लागि नेकपा सचिवालयया बैठक थौं च्वने त्यःगु दु । बैठक थौं ४ बजे प्रधानमन्त्री निवास बालुवाटारय् च्वने त्यःगु खः ।
उगु बैठकय् एमसीसी कार्यदलया दुजःपि भिम रावल व प्रदीप ज्ञवालीया नाप अर्थमन्त्री डा. युवराज खतिवडायात न आमन्त्रित सदस्य कथं ब्बना तःगु दु ।
थ्व स्वया न्ह्यःया बैठकय् न रावल, ज्ञवाली व खतिवडायात सःता एमसीसीबारे नेकपां छलफल याये धुकुगु खः ।
थौंया छलफलं सम्भवतः एमसीसीबारे टुंगो लगे यायेगु नेकपां तयारी यानाच्वंगु दु ।
थुगु संसदया अधिवेशनं एमसीसी पारित यायेगु व मयागु धका नेकपायात दबाव दु ।
पार्टी दुने एमसीसी पारित याये मज्यु धका दवाव दु ।
पार्टीं गठन याःगु कार्यदलं एमसीसी गथे खः अथे पारित मयायेत सुझाव बिःगु खः ।
