एमालेया प्रस्तावित विधानय् ७०दँया वैंश हद कायम
ञंलाथ्व चतुर्दशी ११४१, असोज ४ सोमबाः
नेकपा एमालेया १०क्वःगु महाधिवेशनय् नं ७०दँ वैंश हद कायम हे तयेगु प्रस्ताव याःगु दु ।
म्हिगः न्ह्यागु स्थायी कमिटी मुँज्याय् न्ह्यब्वगु विधान संशोधनसम्बन्धी प्रस्तावय् ७०दँ वैंश हद कायम हे तयेगु उल्लेख यानातःगु दु । थुगु विधान पारित जूसा एमाले नायः केपी शर्मा ओली मेगु छगू कार्यकाल नायः जुइखनिइ ।
ओली वइगु फागुनय् ७१ दँ थ्यनिइ । तर मंसिरय् हे एमाले महाधिवेशन प्रस्ताव याःगु दु । उगु महाधिवेशनं ओलीयात नायः ल्यःगु अवस्थाय् मेगु महाभिव्शनतक्क थ्यनिबलय् निगूगु पुस्ताया आपालं नेतापिं वैंश हदय् लाइ ।
इश्वर पोखरेल, भिम रावल, सुवास नेम्वाङ, अष्टलक्ष्मी शाक्य, युवराज ज्ञवाली लिसेंया नेतृत्वया आकांक्षी नेतापिं उगु ई तक्क ७०दँ वैंश पुलावनेधुंकुगु दु । वंगु ९क्वःगु महाधिवेशन निसें एमालेय् ७० दँया वैंशया हदया व्यवस्था तयातःगु खः ।
तर नायः केपी शर्मा ओली पक्ष दुथ्यागु स्थायी कमिटी मुँज्यां वयान्ह्यः वैंश हदया प्रबन्ध चिइकेगु निर्णय याःगु खः । म्हिगः स्थायी कमिटिइ न्ह्यब्वगु विधान संशोधन प्रस्तावय् सरकार प्रमुख नं निक्वः सिवें अप्वः जुइ मदइगु व्यवस्था दु ।
यदी थुृगु विधान पारित जुल धाःसा केपी ओली आः प्रधानमन्त्री जुइ खनिइ मखु ।
Categorized in राजनीति
