एमालेय् नेपाल पक्षयात मतसें स्थायी कमिटी पुनर्गठन जुल
लहानान्युज | चौलाथ्व द्धादशी ११४१,बैसाख ११ सनिवाः
एमाले नायः केपी शर्मा ओलीं स्थायी समिति पुनर्गठन यासें १९म्ह दुजःया स्थायी कमिटी दयेकादीगु दु ।
प्रधानमन्त्री निवास बालुवाटारय् म्हिगः च्वंगु १०क्वःगु राष्ट्रिय महाधिवेशन आयोजक कमिटीया मुँज्याय् नायः ओलीं माधव नेपाल पक्षया सुं नं नेतायात दुमथ्याकुसें स्थायी समिति घोषणा यानादीगु खः । समितिइ बामदेव गौतम व माओवादीपाखें एमालेय् वःम्ह रामबहादुर थापालिसें ४ म्हसित धाःसा कःघागु दु ।
मुँज्यां कर्णाली प्रदेशय् संसदीय दलया ह्वीप हाचांगाया माओवादी नेतृत्वया सरकारया पक्षय् मतदान याःपिं ४म्ह प्रदेश सांसदयात साधारण दुजः तकं मदइगु याना बर्खास्त याःगु दु । थुकथं बर्खास्त जूपिंलय् प्रकाश ज्वाला, अम्बरबहादुर थापा, कुर्मराज शाही व नन्दबहादुर बुढा दु ।
ह्वीप हाचांगाःम्ह देवी ओलीयात धाःसा हाकनं स्पष्टिकरण न्यनेगु निर्णय नं मुँज्यां याःगु दु । अथेहे मुँज्यां पार्टीया केन्द्रीय दुजःतयेत भूगोल, विभाग व जनसंगठनय् कार्यविभाजन नापं भाला बिउगु दु ।
अथेहे पार्टी हित अःखः ज्यापहः याःगु धासें स्पष्टीकरण न्यपिं माधव नेपाल पक्षया संघीय संसदया २७म्ह सांसदया स्पष्टिकरणया अध्ययन याना निर्णय यायेगु अधिकार नं स्थायी समितियात बिउगु दु ।
अथेहे मुँज्यां वइगु जेठ ६ गते जुइगु राष्ट्रिसभा निर्वाचनय् एमालेंया पाखें रामबहादुर थापायात हे उम्मेदवार दयेकेगु निर्णय तकं याःगु दु । मुँज्यां न्हियान्हिथं अप्वयावंगु कोभिड संक्रमणयात पनेत सरकारयात थप प्रभावकारी पलाः न्ह्याकेत तकं सरकारया ध्यान सालाकाःगु दु ।
Categorized in राजनीति
