एमाले औपचारिक कथं ब्वथलिगुया साइतय्
कछलागा नवमी ११४१, जेठ २१ शुक्रबाः
सत्तारुढ दल नेकपा एमाले औपचारिक कथं ब्वथलिगुया साइत पियाच्वंगु खनेदु ।
झलनाथ खनाल व माधव नेपाल पक्षीय केन्द्रीय दुजःतये म्हिगःया भर्चुअल मुँज्याय् पार्टी ब्वथला न्हूगु दल दर्ता यायेमाःगु धासें छ्याता वःगु दु । मुँज्याय् दुथ्याम्ह नेता विरोध खतिवडाया कथं नायः केपी शर्मा ओलीया अपहेलना व प्रतिगमनयात बुकेत न्हूगु पार्टीै घोषणाय् केन्द्रीय दुजःतयेसं बः बिउगु दु ।
अथेहे पार्टी दुने अन्तरसंघर्ष यायेमाःगु व निन्हू प्यन्हू ई बिया नायः केपी ओली पक्षलिसे संवाद यायेमाःगु छ्याता नं केन्द्रीय दुजःतयेसं बिउगु दु । सहलहस नेता नेपालं लिपांगु राजनीतिक घटनाक्रम, संस्थापन पक्षया नेतातयेलिसे जूगु संवादया खँय् जानकारी बियादीगु खः । नेता नेपालं नायः ओली भिनिगु छुमां खनेमदूगु व वार्ता, सहलहया नायम् हाकनं झंगः लायेत स्वःगु खँ लिसाकयादीगु खः ।
थ्वयान्ह्यः खनाल–नेपाल पुचः लिक्कसंया १७गू वटा भ्रातृ संगठनतयेसं न्हूगु पार्टी घोषणा यायेमाःगु माग याःगु खः । पार्टी व जनसंगठनतये फुक्क संरचनायात २०७५ जेठ २ या अवस्थाय् लिहाँमवंसा पार्टी विसर्जन जुइगु व न्हूगु पहःलं पुनर्गठन यायेमाःगु उमिगु माग दु ।
संगठनतये बुधबाः च्वंगु मुँज्याया निर्णय विज्ञप्तिपाखें सार्वजनिक यासें उमिसं ओलीया असंवैधानिक, अलोकतान्त्रिक व प्रतिगामी पलाःखं संघीय लोकतान्त्रिक व्यवस्था व संविधान संकटय् लाःगु धासें पार्टी विधान अःखःया स्वेच्छाचारी निर्णयलं नेकपा (एमाले) व कम्युनिष्ट आन्दोलन संकटय् लाःगु उल्लेख याःगु दु । विज्ञप्तिइ किसान महासंघ, महिला संघ, अनेरास्ववियूका, युवा संघ, प्रेस चौतारी लिसेंया भातृ संस्थातयेसं ल्हाचिं तःगु दु । थुखे ओली पुचःलं धाःसा माधव नेपाल, भीम रावललिसेंया नेतापिं बाहेक जक पार्टी एकता सम्भव जुइगु धाःगु दु ।
ओलीलिक्कसंयाम्ह नेता कर्ण थापां पार्टी ब्वथला वनिपिन्त आः पने मफइगु प्रतिकृया बियादील । पार्टी एकता लिपांगु ई तक्क कायम यायेत ओलीं कुतः याःसा नं छुं अराजक नेतापिं दुथ्याना आः एकता संभव मजूगु वयेकया तर्क दु । थुखे नेता विशाल भट्टराइं नं पार्टी एकताया हे नितिं तक्वःमछि स्थायी कमिटी मुँज्यायात लिचिला कुतः याःगु जूसा नं आः उगु सम्भावना चिलावंगु धयादील ।
Categorized in राजनीति
