बनमन्त्री शंकर भण्डारीं भारतीय राजदूतयात लित छ्वयेमाः धकाः याःगु माग कुटनितिक मर्यादा अःखः जूगु टिप्पणी यानादिसेंं प्रमुख विपक्षी नेकपा एमालेयात दंगु लोकप्रियताया नितिं गैर जिम्मेवारपूर्ण ज्या याःगु नं द्वपं बियादीगु दु । नेकपा एमालेया भातृ संगठनं भारतीय राजदूत रणजीत रेयात देशं पितिनाछ्वय्त माग याना वयाच्वंगु खः ।

मन्त्री भण्डारीं संविधान संशोधन प्रस्ताव सदनय् प्रकृयाय् यंके मबीसे संसदय् पंगः थनाः एमाले गैरजिम्मेवारपूर्ण व्यवहार यानाच्वंगु नं द्वपं बियादिल । वय्कलं संशोधन प्रस्तावया विरोध यायेगु धइगु थःम्हेस्यां घोषणा याःगु प्रतिबद्धताया प्रतिकूल जूगु नं धयादीगु दु । सरकारं दर्ता याःगु संशोधन प्रस्तावया ५ नं. प्रदेशया सीमांकन हेरफेरय् थःगु पार्टी लिसें मेमेगु दलया सुंसुं नेतात असन्तुष्ट जुयाच्वंसा नं थुगु प्रस्ताव न्हापा कांग्रेस व नेकपा एमाले हे मंकाःकथं न्ह्यःने हःगु नं दावी यानादिल । मन्त्री भण्डारीं संशोधन प्रस्तावय् एमालें नं ग्वाहालि याइगु खँय् थः विश्वस्त जूगु खँ धयादिसें एमालें ग्वाहालि याःसा देशं निकास प्राप्त याइगु नं स्पष्ट यानादीगु दु । वय्कलं धयादिल, दलत जानाः न्ह्यःने वनेगुया विकल्प मदु ।

Categorized in राजनीति