नेकपा एमालें झिक्वःगु राष्ट्रिय महाधिवेशनय् जुइगु निर्वाचनया मतदानया लागिं सच्छिगः इलेक्ट्रोनिक भोटिङ मेसिन (इभिएम) छ्यलीगु जूगु दु ।

महाधिवेशनय् छन्हुं हे मतदान व लिच्वः सार्वजनिक यायेगु कथं तयारी जूगु व व हे कथं इभिएम छ्यलेत्यंगु महाधिवेशन मूल व्यवस्थापन समितिं न्ह्यथंगु दु । एमालेया झिक्वःगु राष्ट्रिय महाधिवेशन चितवनय् मसिर १० निसें १२ गतेतक्क जुइ । छम्ह प्रतिनिधियात मतदान यायेत म्ह्वतिं बाघौ बीगु अनुमान याःगु दु । उकिया लागिं सम्बन्धित कम्पनीयात तयारीयात लागिं जायेत धाःगु दु ।

गुक्वःगु महाधिवेशनय् इभिएम छ्यलेगु विषयस सहमति मजुबलय् नेतृत्वया चुनावय् मतपत्रया हे व्यवस्था याःगु खः । निर्वाचनया लिच्वः वयेत छवाः ब्यूगु खः । झिक्वःगु महाधिवेशनय् द्वःछि ९सः व ९९ प्रतिनिधिया ब्वति दइ ।

वंगु लाय् गोदावरीइ जूगु विधान महाधिवेशनं पारित याःगु न्हूगु विधानया व्यवस्था कथं झिक्वःगु राष्ट्रिय महाधिवेशनं नायः, बरिष्ठ न्वकूलिसें न्याम्ह न्वकू, मू छ्यान्जे, ल्यू मू छ्यान्जे व न्हय्म्ह छ्यान्जे यानाः १५ पदाधिकारी लिसेंया २सः व २५ दुजःया केन्द्रीय कमिटी निर्वाचित याइ । केन्द्रीय दुजलय् खुलापाखे ९८, समावेशीपाखे ६६ व भूगोलपाखे ४६ यानाः २सः व १० निर्वाचित जुइ ।

अथे हे, महाधिवेशनं १५ दुजःया अनुशासन आयोग व केन्द्रीय लेखा आयोग नं ल्यइ । स्वब्वय् छब्व मिसालिसें नेपालया सामाजिक व वर्गीय विविधताया प्रतिनिधित्व जुइगु कथं केन्द्रीय कमिटी समावेशी यायेगु व्यवस्था विधानय् दु ।

एमालें १० गते नारायणी खुिस सिथय् उद्घाटन व सौराहाया हात्तिसारं नेतृत्व ल्ययेत बन्दसत्र यायेगु तयारी याःगु दु । ११ गते मनोनयन व प्रतिनिधितय्त इभिएम मतदान यायेत अभ्यास व १२ गते मतदान जुइ ।

Categorized in राजनीति