एमाले व माओवादी दथुइ चैत्रय् पार्टी एकता जुइगु
लहनान्युज | चिल्लाथ्व सप्तमी ११३८ (फेब्रुअरी २२ २०१८)
नेकपा एमाले व माओवादी केन्द्रया दथुइ पार्टी एकताया गृहकार्य यायेत गथन याःगु निगु दलया कार्यदलयात झिन्यान्हुया दुने प्रतिवेदन बुझेयायेत निर्देशन बिगु दु ।
एमाले व माओवादी नेता तयेस वंगु फागुन ७ गते पार्टी एकताया लागि न्ह्ययेगु बुँदया आधारय् ल्हाचिं तःगु खः । नााप पार्टीया संगठन व अन्तरिम विधान दयेकिगु लागि निगु कार्यदल दयकुगु खः ।
उगु संगठन निर्माण सम्बन्धी कार्यदलय् एमालेपाखें ईश्वर पोखरेल, विष्णु पौडेल, गोकर्ण विष्ट, बेदुराम भुषाल व रघुवीर महासेठ च्वनादीगु दुःसा माओवादीपाखें रामबहादुर थापा बादल, गिरिराजमणि पोखरेल, वर्षमान पुन, जनार्दन शर्मा व मातृका यादव च्वनादीगु खः ।
अथेहे पाटीया अन्तरिम विधान दयेकेत एमालेपाखें माधवकुमार नेपाल, भीम रावल, सुवास नेम्वाङ, प्रदीप ज्ञवाली व रघुजी पन्त नाप माओवादीपाखे नारायणकाजी श्रेष्ठ, देव गुरुङ, शक्ति बस्नेत, पम्फा भुषाल व देवेन्द्र पौडेल च्वनादीगु खः ।
निगुया हे कार्यदलं प्रतिवेदन बुझेयाये धुका पार्टी एकता घोषणा याइगु धका न धाःगु खः । माओवादी नेता नारायणकाजी श्रेष्ठं पार्टी एकताया घोषणा थ्व हे वइगु चैत जुइगु सम्भावना दु धयादीगु दु ।
