एसईईलिसें उच्च शिक्षा हासिल याःपिन्त हन
लहनान्युज | गुंलाथ्व द्धादशी ११३९ (अगष्ट १२ २०१९)
नेपाल राष्ट्रिय खड्गी समाज, यल जिल्ला समितिपाखें यलया कुम्भेश्वरय् छगू ज्याझ्वःया दथुइ एसईईलिसें उच्च शिक्षा हासिल यानादीपिन्त हंगु दु ।
जिल्ला समितिया नायः अरोजकुमार खड्गीया सभाध्यक्षताय् जूगु उगु हनेज्याझ्वःया उलेज्या मूपाहाँलिसें यल महानगरपालिकाया प्रमुख चिरीबाबु महर्जनं त्वाःदेवा च्याकाः यानादीगु खः ।
मूपाहाँ प्रमुख महर्जनं एसईई परीक्षाय् पास जुयादीपिं लिसें उच्च शिक्षा हासिल यानाः डाक्टर, पाइलट, इन्जिनियर, अधिबक्ता जुयादीपिन्त नं हनादीगु खः । हनेगु झ्वलय् मूपाहाँ महर्जनं एसईईलिसें डाक्टर, पाइलट, इन्जिनियर व अधिबक्तायात छक्वलं हनेदुगु लसताया खँ जूगु धयादिसें यल महानगरपालिका दुने एसईई परीक्षाय् न्हाप जुयादीपिं मिसा व मिजंम्ह ब्वँमियात दांलिसें सिरपाः बीगु नं घोषणा यानादिल ।
कपिल खड्गीं न्ह्याकादीगु उगु ज्याझ्वलय् विशेष पाहाँकथं नेपाल राष्ट्रिय खड्गी समाजया केन्द्रीय मूछ्याञ्जे नन्दकिशोर शाही झायादीगु खःसा पाहाँकथं समाजा केन्द्रीय छ्याञ्जे श्यामकृष्ण शाही, केन्द्रीय दांभरि भगवती शाही, येँ जिल्ला नायः सुवास शाही, कुम्भेश्वर टेक्निकल स्कूलया प्रबन्ध निर्देशक किरण बहादुर खड्गी, ग्रायण्ड एकेदेमिया प्रधानाध्यापक सीमा राई, देउराली सहकारी संस्थाया नायः विकास महर्जन झायादीगु खः ।
ज्याझ्वलय् सभाध्यक्षपाखें मूपाहाँ यल महानगरपालिकाया प्रमुख महर्जनलिसें विशेष पाहाँ, पाहाँपिन्त मतिनाया चिं लःल्हानादीगु खः ।
यल जिल्ला समितिया न्वकू प्रकाश खड्गीं सुभाय् देछानादीगु उगु ज्याझ्वलय् ज्याझ्वःया कजि संजय खड्गीं लसकुस यानादीगु खः ।