२०८० चैत्र १६, शुक्रबार

एसिसी यु–१९ एशिया कप क्रिकेट कासाया नितिं नेपाःया टिम घोषणा

लहना न्यूज | ने.सं. ११३९ गुंलागा सप्तमि (२२ अगष्ट, २०१९), विहिवाः

श्रीलंकाय् जुइत्यंगु एसिसी यु–१९ एशिया कप क्रिकेट कासाया नितिं नेपाःया राष्ट्रिय टिम घोषणा याःगु दु ।
 
प्रशिक्षक विनोदकुमार दासं रोहितकुमार पौडेलया कप्तानीइ १५म्ह दुजः दुगु राष्ट्रिय टिमया घोषणा याःगु खः । उगु टिमय् स्पीनर सूर्य तामाङ व सन्दीप जोरां पुनरागमन याःगु दु ।
 
टिमय् रोहितकुमार पौडेलया नापनापं पवन सर्राफ, सन्दीप जोरा व आशिफ शेखलिसे सिनियर टिमपाखें म्हितूगु अनुभव दु ।
 
वंगु महिनाय् मलेसियाय् जूगु यु–१९ इस्टर्न रिजन कासा म्हितूपिं विशालविक्रम केसी व तिलकराज भण्डारी धाःसा टिमय् मलात ।
 
कासाया धलःकथं नेपाः बी पुचलय् लानाच्वंगु दु । नेपाःया पुचलय् ग्वसाः देय् श्रीलंकालिसें बंगलादेश व संयुक्त अरब इमिरेट्स (युएई) लानाच्वंगु दु ।
 
भाद्र १९गते निसें २८ गतेतक जुइगु उगु कासाय् नेपालं भाद्र २०गते श्रीलंकालिसे धेंधेंबल्ला याइ । अथे हे, नेपालं बंगलादेशलिसे भाद्र २२ व युएईलिसे भाद्र २४गते म्हिती ।
 
नेपाःया टिम कंस सञ्चरवाः भारत वनी । भारतय् छुं दिं अभ्यास कासा म्हितेधुंकाः नेपाःया टिम अनतुं श्रीलंका वनी ।
 
नेपाःया टिम
 
रोहितकुमार पौडेल (कप्तान), रीत गौतम, पवन सर्राफ, मोहम्मद आशिफ शेख, सन्दीप जोरा, भीम सार्की, हरिबहादुर चौहान, कुशल मल्ल, राशिद खान, कमलसिंह ऐरी, सागर ढकाल, खडकबहादुर बोहरा, सूर्य तामाङ, लोकेश बहादुर बम, प्रतीश जिसी
Categorized in कासा